ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤘꤤ꤭ꤗꤟꤢꤪꤏꤥ꤬ꤠꤟꤤ꤭ꤗꤣ꤭ ꤊꤢꤨ꤭ ꤜꤟꤥꤡꤢꤧ ꤊꤜꤛꤢ ꤘꤣ (ꤍ꤉ꤢꤩ꤬ꤘꤢꤪ꤬ꤏꤢꤧ꤬) ꤓꤛꤢꤩ꤭ꤋꤢꤪ꤬ꤋꤢꤨ꤬ꤛꤢꤩ꤭ ꤢ꤬ꤕꤛꤢꤩꤢ꤬ꤊꤛꤢ꤭ ꤟꤢꤪꤚꤢꤪ ꤗꤟꤛꤢ꤬ꤊꤟꤢꤩꤋ꤉ꤤ ꤕꤚꤟꤢꤧ꤬ꤤ꤬ꤏꤢꤪꤒꤟꤢꤧ꤬ ꤢ꤬ꤕꤜꤢꤪꤢ꤬ꤗꤟꤢꤨ꤬ ꤟꤛꤢ꤭ꤗꤟꤢꤩ꤬ꤚꤛꤢ ꤕꤟꤢꤩꤟꤢꤪ ꤔꤛꤣ꤬ꤗꤢ꤬ ꤞꤢꤧꤑꤢꤩ꤭ꤔꤟꤤ ꤘꤢꤦ꤬ꤒꤟꤢꤧ꤬ꤚꤢꤩ꤬ ꤖꤢꤨꤔꤛꤣ꤬꤯
ꤙꤤ ꤢꤪꤒꤥ꤬ꤙꤢ꤬ꤜꤢꤧ꤭ ꤃꤀ ꤞꤢꤧ꤭ ꤢ꤬ꤋꤢꤧ꤭ ꤔꤛꤣ꤬ ꤘꤣ ꤢ꤬ꤔꤢ꤬ ꤃꤀ ꤢ꤬ꤊꤢꤨ꤭ ꤗꤟꤛꤢ꤬ꤊꤟꤢꤩꤋ꤉ꤤ ꤟꤛꤢ꤭ꤗꤟꤢꤩ꤬ꤚꤛꤢ ꤓꤛꤢ꤬ ꤕꤟꤢꤩꤟꤢꤪ ꤜꤟꤥꤡꤢꤧꤊꤜꤛꤢ ꤓꤛꤢꤩ꤭ꤋꤢꤪ꤬ꤋꤢꤨ꤬ (ꤍ꤉ꤢꤩ꤬ꤘꤢꤪ꤬ꤏꤢꤧ꤬) ꤛꤢꤩ꤭ ꤔꤛꤣ꤬ꤗꤢ꤬ ꤊꤢ꤬ꤜꤢꤨꤜꤣ ꤒꤢ꤬ꤟꤢꤦ꤬ ꤖꤢꤨꤔꤛꤣ꤬꤯
ꤜꤟꤥꤡꤢꤧꤘꤢꤨ꤬, ꤜꤟꤥꤡꤢꤧ ꤘꤛꤢ꤬ꤞꤎꤢꤪ꤬ ꤔꤢ ꤜꤟꤥꤡꤢꤧꤘꤣ ꤢ꤬ꤚꤟꤛꤣ꤬ ꤒꤢ꤬ꤟꤢꤩ꤬ ꤡꤛꤣꤊꤟꤢ꤬ꤡꤛꤣꤟꤛꤢ꤭ꤏꤢꤪ꤭ ꤜꤢ꤭ꤚꤢꤪ ꤢ꤬ꤕꤛꤢꤩꤢ꤬ꤊꤛꤢ꤭ ꤊꤛꤢ꤭ꤟꤢꤪ ꤔꤛꤣ꤬ꤗꤢ꤬ ꤘꤤ꤭ꤗꤢꤪꤏꤥ꤬ ꤠꤟꤤ꤭ꤊꤢꤨ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩꤘꤢꤦ꤬ꤖꤢꤨꤔꤛꤣ꤬꤯
“ ꤊꤜꤛꤢꤛꤢꤩ꤭ ꤢ꤬ꤜꤟꤛꤢ ꤒꤟꤢꤔꤢꤒꤥ꤬ ꤚꤢꤪ ꤜꤟꤥꤡꤢꤧ ꤖꤢꤨꤒꤢꤩ꤭ ꤒꤢ꤬ꤟꤢꤩ꤬ꤒꤢꤩ ꤗꤢ꤬ ꤢ꤬ꤡꤛꤣꤢ꤬ꤊꤟꤢ꤬ ꤜꤟꤢꤪ꤭ꤕꤚꤢꤧ ꤙꤤ ꤢ꤬ꤋꤢꤨ꤬ꤛꤢꤩ꤭ꤔꤛꤣ꤬, ꤕꤟꤢꤨꤜꤟꤥꤊꤜꤛꤢ ꤥ꤬ꤘꤣ ꤢ꤬ꤜꤟꤢꤧ꤭ꤜꤟꤛꤢ꤬ ꤔꤛꤣ꤬ ꤒꤢ꤬ꤘꤣ꤬ꤚꤢꤪ ꤢꤨ꤭ꤕꤚꤟꤢꤧ꤬ ꤡꤛꤣꤠꤟꤢꤪ꤬ ꤔꤢ ꤊꤜꤛꤢꤛꤢꤩ꤭ ꤔꤛꤣ꤬ ꤢ꤬ꤥ꤬ꤒꤥ꤬ ꤓꤛꤣ꤭ ꤊꤜꤛꤢꤛꤢꤩ꤭ ꤢ꤬ꤕꤛꤢꤩꤢ꤬ꤊꤛꤢ꤭ ꤑꤢ꤬ꤡꤢꤪꤟꤢꤪ" ꤢ꤬ꤟꤢꤩꤘꤢꤦ꤬꤯
ꤢ꤬ꤟꤢꤩꤕꤟꤥ ꤔꤢ “ ꤊꤜꤛꤢꤔꤛꤣ꤬ ꤢ꤬ꤒꤟꤢ꤭ꤒꤟꤢꤪ꤬ ꤜꤟꤢꤪ꤭ꤟꤢꤪ, ꤢ꤬ꤕꤟꤢꤩ꤭ꤒꤟꤢ ꤕꤢ꤭ꤔꤢꤒꤥ꤬, ꤋꤢ꤭ꤜꤟꤢꤩ ꤒꤢ꤬ꤟꤢꤩ꤬ꤟꤢꤩ꤬ ꤗꤢ꤬ ꤢ꤬ꤊꤢ꤬ꤢꤪ꤬, ꤢ꤬ꤒꤢ꤬ꤕꤜꤟꤢꤨꤓꤛꤢ꤬ꤘꤢꤦ꤬ ꤖꤢꤨꤔꤛꤣ꤬, ꤊꤤ꤬ꤡꤛꤣ ꤔꤢ ꤜꤟꤥꤡꤢꤧꤒꤟꤢꤪꤓꤢꤧ (ꤏꤣꤧ꤬ꤊꤢꤧ꤬) ꤟꤢꤩꤗꤢ꤬ ꤢ꤬ꤙꤢꤧ꤬ ꤒꤢ꤬ꤙꤢꤪ꤬ ꤘꤣ ꤢ꤬ꤜꤟꤢꤧ꤭ ꤖꤢꤨꤔꤛꤣ꤬"
ꤊꤜꤛꤢꤛꤢꤩ꤭ ꤢ꤬ꤚꤢꤩ꤬ꤘꤢꤨ꤬ ꤊꤟꤌꤣ꤭ꤜꤢ꤭ ꤕꤚꤟꤢꤧ꤬ꤡꤛꤣꤕꤚꤟꤢꤧ꤬ꤊꤟꤢ꤬ ꤒꤢ꤬ꤟꤢꤩ꤬ꤢ꤬ꤑꤢꤩ꤭ ꤔꤛꤣ꤬ꤗꤢ꤬ ꤢ꤬ꤟꤢꤩꤡꤛꤣ ꤕꤟꤥ ꤖꤢꤨꤛꤢꤩ꤭꤯
“ꤊꤜꤛꤢꤛꤢꤩ꤭ ꤢ꤬ꤚꤢꤩ꤬ꤘꤢꤨ꤬ ꤓꤛꤣ꤭ꤒꤥ꤬ ꤢꤨ꤭ꤡꤛꤣ ꤢꤨ꤭ꤊꤟꤢ꤬ꤏꤢꤪ꤭ ꤑꤢ꤬ꤡꤢꤪꤢꤧ꤬, ꤊꤤ꤬ ꤢ꤬ꤕꤛꤢꤩꤊꤛꤢ꤭ ꤟꤢꤩꤗꤢ꤬ ꤢꤕꤟꤛꤢꤢ꤬ꤏꤢꤧ꤭ ꤑꤢ꤬ꤡꤢꤪ, ꤊꤜꤛꤢꤛꤢꤩ꤭ ꤢ꤬ꤥ꤬ꤚꤢꤪ ꤢ꤬ꤐꤟꤢꤨ꤭, ꤢ꤬ꤕꤚꤟꤛꤢ꤭ ꤖꤢꤨꤔꤛꤣ꤬" ꤢ꤬ꤟꤢꤩꤘꤢꤦ꤬꤯
ꤓꤛꤢꤩ꤭ꤋꤢꤪ꤬ꤋꤢꤨ꤬ ꤊꤜꤛꤢꤛꤢꤩ꤭ ꤢ꤬ꤜꤟꤛꤢ ꤁꤅ ꤕꤜꤟꤢꤧ, ꤢ꤬ꤓꤢꤨ꤭ ꤂꤂꤅꤀ ꤕꤜꤟꤢꤧ ꤓꤛꤣ꤭ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩꤊꤢꤨ꤭ ꤜꤟꤢꤩꤡꤛꤣ ꤜꤟꤢꤩꤊꤟꤢ꤬ ꤘꤣ ꤊꤟꤢꤩꤊꤢꤨ꤭ ꤔꤢ ꤕꤚꤟꤢꤩꤛ꤉ꤤ꤬ꤊꤟꤢꤩ ꤜꤟꤥꤡꤢꤧꤊꤜꤛꤢ ꤖꤢꤨꤔꤛꤣ꤬ ꤔꤛꤣ꤬ꤗꤢ꤬ ꤞꤢꤧꤑꤢꤩ꤭ꤔꤟꤤ ꤘꤢꤦ꤬ ꤒꤟꤢꤧ꤬ꤚꤢꤩ꤬ ꤖꤢꤨꤔꤛꤣ꤬꤯
