ꤞꤢꤧꤑꤢꤩ꤭ ꤔꤟꤤ ꤒꤟꤢꤧ꤬ꤚꤢꤩ꤬ ꤔꤢ ꤘꤣ ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩꤊꤢꤨ꤭ ꤙꤤ ꤖꤚꤢꤨ꤬ꤏꤥ꤬ꤠꤟꤤ꤭ꤗꤣ꤭ꤊꤢꤨ꤭ ꤔꤛꤣ꤬ ꤟꤢꤩ꤬ꤋꤢꤨ꤬ꤋꤢ꤭ꤜꤟꤢꤩ ꤘꤣ ꤗꤟꤛꤢ꤬ꤊꤜꤛꤢꤩ꤭ ꤚꤟꤢꤩꤟꤢꤪ꤭ꤕꤜꤢꤪ ꤛꤢꤩ꤭ ꤢꤧ꤬ꤞꤤ꤭ ꤘꤛꤢ꤬ꤒꤟꤢ꤭ ꤍꤟꤥꤡꤤ ꤔꤢ ꤙꤢꤧ꤬ꤊꤢꤧꤘ꤉ꤟꤥꤜꤟꤢꤧ, ꤖꤛꤢꤩꤘ꤉ꤟꤥꤕꤚꤟꤛꤢ꤭ ꤊꤛꤢ꤭ ꤙꤟꤌꤣ ꤔꤢ ꤤ꤬ꤞꤎ꤉ꤤꤘꤢꤪ꤭ꤙꤛꤢ꤭ꤜꤢꤧ꤬ ꤒꤢ꤬ꤟꤢꤩ꤬ ꤟꤢꤩꤘꤢꤦ꤬꤯
ꤡꤢꤙꤤ ꤛꤢꤩ꤭ꤒꤣ꤬ꤔꤢ꤬ ꤖꤢꤩ꤬ꤖꤢꤪ꤬꤉ꤢ꤬ꤚꤤ꤬ꤜꤢꤧ꤭ ꤢ꤬ꤋꤢꤧ꤭ ꤗꤟꤛꤢ꤬ꤊꤜꤛꤢꤩ꤭ ꤤ꤬ꤟꤢꤪ꤭ꤕꤜꤢꤪꤊꤛꤢ꤭ ꤋꤢ꤭ꤜꤟꤢꤩ ꤙꤤ ꤜꤟꤢꤪꤡꤟꤢ꤬, ꤗꤟꤢ꤭ꤕꤚꤟꤥ꤬ꤏꤛꤢꤩ ꤔꤢ ꤘꤢꤪ꤭ꤜꤟꤢꤪꤋꤢꤨ꤬ ꤘꤢꤪ꤭ꤛꤢꤩ꤭ ꤃ ꤘꤢꤪ꤭ ꤟꤢꤩ꤬ꤋꤢꤨ꤬ꤜꤟꤛꤢ ꤢꤩ꤬ꤊꤢ ꤂꤇꤀꤀ ꤔꤛꤣ꤬ ꤘꤢꤪ꤭ꤖꤢꤨꤏꤥ꤬ꤖꤢꤨꤒꤢ꤬ꤊꤜꤢꤪ ꤊ꤉ꤟꤤ꤭ ꤤ꤬ꤏꤢꤪꤢꤩ꤬ꤋꤛꤢꤩ꤭ꤘꤛꤢꤩ ꤒꤢ꤬ꤕꤜꤟꤣ꤬ꤒꤢ꤬ꤕꤜꤛꤢ ꤚꤢꤪ ꤛꤢꤩ꤭ꤋꤥ꤭ꤑꤟꤢ ꤗꤟꤛꤢ꤬ꤊꤜꤛꤢꤩ꤭ꤛꤢꤩ꤭ ꤘꤛꤢ꤬ꤒꤟꤢ꤭ꤋꤛꤢꤩ꤭ꤟꤢꤪ ꤍꤟꤥꤡꤤ ꤘꤣ ꤙꤢꤧ꤬ꤊꤢꤧꤘ꤉ꤟꤥ ꤖꤛꤢꤩꤘ꤉ꤟꤥ ꤜꤟꤢꤧ ꤕꤚꤟꤛꤢ꤭ꤊꤛꤢ꤭ꤋꤛꤢꤩ꤭ ꤖꤢꤨꤔꤛꤣ꤬ ꤟꤢꤩꤘꤢꤦ꤬꤯
ꤙꤤ ꤔꤥ꤬꤉ꤢꤩ꤬ꤙꤢ꤬ꤜꤢꤧ꤭ ꤁꤁ ꤞꤢꤧ꤭ ꤛꤢꤩ꤭ ꤔꤛꤣ꤬ ꤗꤟꤛꤢ꤬ꤊꤜꤛꤢꤩ꤭ ꤊꤜꤛꤢꤩ꤭ꤒꤟꤢꤧ꤬ꤞꤛꤥꤒꤥ꤭ ꤞꤢꤚꤢꤘꤢꤨ꤬ ꤘꤢꤧ꤭ꤓꤢꤩ꤬ꤜꤟꤛꤣ꤭ ꤔꤢ ꤜꤟꤢꤩꤗꤟꤢꤩ꤬ꤟꤛꤢ꤭ꤊꤜꤛꤢ ꤚꤢꤪ ꤘꤣ ꤘꤢꤪ꤭ꤖꤢꤨꤏꤥ꤬ꤖꤢꤨ ꤤ꤬ꤏꤢꤪꤓꤛꤣ꤭ ꤒꤟꤢꤧ꤬ꤗꤟꤢꤪ ꤒꤟꤢꤧ꤬ꤙꤥ꤭ ꤒꤢ꤬ꤟꤢꤩ꤬ ꤙꤢꤧ꤬ ꤖꤛꤢꤩꤘ꤉ꤟꤥ ꤊꤛꤢ꤭ꤕꤚꤟꤛꤢ꤭ ꤔꤛꤣ꤬ꤗꤢ꤬ ꤘꤢꤪ꤭ꤖꤢꤨꤏꤥ꤬ꤖꤢꤨ ꤒꤢ꤬ꤟꤢꤩ꤬ ꤟꤢꤩꤏꤥ꤬ꤘꤢꤦ꤬ ꤖꤢꤨꤔꤛꤣ꤬꤯
ꤘꤢꤪ꤭ꤜꤟꤢꤪꤋꤢꤨ꤬ ꤘꤢꤪ꤭ꤊꤢꤨ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩ ꤔꤢ ꤙꤟꤌꤣ ꤔꤛꤣ꤬ꤗꤢ꤬ ꤊꤢꤧꤘ꤉ꤟꤥ ꤜꤢꤧꤕꤚꤢꤧ ꤗꤢ꤬ ꤔꤢ ꤘꤣ ꤤ꤬ꤞꤎ꤉ꤤꤘꤢꤪ꤭ꤙꤛꤢ꤭ꤜꤢꤧ꤬ ꤞꤤ꤭ ꤒꤢ꤬ꤟꤢꤩ꤬ ꤔꤛꤣ꤬ ꤢ꤬ꤕꤚꤟꤢꤧꤜꤢ꤭ꤟꤤꤒꤥ꤬ ꤢ꤬ꤘꤛꤢ꤬ꤕꤢ꤭ ꤕꤚꤢꤧ ꤚꤢꤪ ꤖꤛꤢꤩꤘ꤉ꤟꤥꤡꤟꤛꤢ ꤜꤢ꤭ꤟꤤꤒꤥ꤬ ꤟꤢꤩ ꤘꤢꤦ꤬꤯
ꤢ꤬ꤟꤢꤩ ꤔꤢ “ꤕꤟꤢꤧ꤬ ꤊꤢꤧꤜꤢꤧ ꤕꤚꤢꤧ ꤙꤟꤌꤣ ꤒꤢ꤬ꤊꤟꤌꤣ꤬ꤒꤟꤛꤣ꤭, ꤗꤢ꤬ꤔꤢ ꤘꤣ ꤕꤟꤢꤧ꤬ ꤤ꤬ꤞꤎ꤉ꤤ ꤘꤢꤪ꤭ꤙꤛꤢ꤭ꤜꤢꤧ꤬ ꤔꤛꤣ꤬ ꤙꤢꤧ꤬ꤜꤢ꤬ꤡꤟꤢꤨ ꤊꤛꤢ꤭ꤕꤚꤢꤧꤟꤢꤪ" ꤢ꤬ꤟꤢꤩꤘꤢꤦ꤬꤯
ꤘꤣ ꤗꤟꤌꤣꤖꤢꤧ꤭ ꤢꤨ꤬ꤡꤢꤧ꤭ꤒꤢ꤬ꤐꤟꤢꤧ ꤟꤢꤩ꤬ꤋꤢꤨ꤬ ꤋꤢ꤭ꤜꤟꤢꤩꤛꤢꤩ꤭ ꤕ꤉ꤟꤥ꤭ꤔꤢ꤬ ꤕ꤉ꤟꤥ꤭ꤜꤢꤧ꤭ ꤗꤟꤢꤩ꤬ꤢꤩ꤬ꤗꤟꤢꤩ꤬ꤥ꤭ ꤤ꤬ꤏꤢꤪꤤ꤬ꤕꤜꤢꤦ꤭ ꤟꤛꤢ꤭ꤘꤛꤢꤩ ꤔꤢ ꤙꤟꤌꤣ, ꤓꤢ꤬, ꤊꤢꤪꤙꤤ꤭ꤞꤎꤢꤨ ꤔꤢ ꤊꤢꤨ꤬ꤋꤢꤩ ꤛꤢꤩ꤭ ꤋꤥ꤭ꤑꤟꤢ ꤢ꤬ꤋꤢꤧ꤭ ꤗꤟꤛꤢ꤬ꤊꤟꤢꤩꤋ꤉ꤤ ꤟꤢꤪ꤭ꤕꤜꤢꤪꤊꤛꤢ꤭ ꤖꤢꤨꤛꤢꤩ꤭ ꤔꤛꤣ꤬ꤚꤢꤪ ꤘꤢꤪ꤭ꤖꤢꤨꤏꤥ꤬ꤖꤢꤨ ꤒꤢ꤬ꤟꤢꤩ꤬ ꤜꤟꤢꤩꤗꤟꤢꤩ꤬ꤢꤩ꤬ꤗꤟꤢꤩ꤬ꤥ꤭ ꤢ꤬ꤑꤢꤩ꤭ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭ ꤥ꤬ꤑꤢ꤬ꤡꤢꤪ ꤔꤛꤣ꤬ ꤗꤢ꤬ ꤊꤢ꤬ꤛꤢ꤭ꤜꤟꤤ꤬ ꤒꤟꤢꤧ꤬ꤗꤟꤢꤩ꤬ꤡ꤉ꤟꤥ ꤜꤣꤙꤢ꤭ ꤕꤚꤟꤢꤧ꤬ꤜꤟꤢꤨ꤬ꤚꤢꤩ꤬ ꤔꤢ ꤒꤟꤢꤧ꤬ꤗꤟꤢꤩ꤬ꤘꤢꤨ꤬ꤓꤛꤢ꤬ ꤜꤣꤙꤢ꤭ ꤋꤢ꤭ꤏꤛꤢꤩꤊꤜꤟꤢꤪ꤬ (KSWDC) ꤕꤚꤟꤢꤧ꤬ꤟꤢꤩꤙꤢꤧ꤬ ꤢ꤬ꤋ꤉ꤢ ꤢ꤬ꤛꤢ꤭ꤥ꤬ ꤙꤢꤗꤢꤔꤣꤧ꤬ ꤟꤢꤩꤘꤢꤦ꤬ ꤖꤢꤨꤛꤢꤩ꤭꤯
“ꤗꤟꤛꤢ꤬ꤊꤜꤛꤢꤩ꤭ ꤟꤛꤢ꤭ ꤟꤢꤪ꤭ꤕꤜꤢꤪꤖꤢꤩ꤬ꤊꤛꤢ꤭ ꤘꤢꤪ꤭ꤖꤢꤨꤏꤥ꤬ꤖꤢꤨ ꤛꤢꤩ꤭ ꤗꤟꤌꤣꤖꤢꤧ꤭ꤢꤨ꤬ꤡꤢꤧ꤭ ꤜꤟꤢꤩꤗꤟꤢꤩ꤬ꤢꤩ꤬ꤗꤟꤢꤩ꤬ꤥ꤭ꤘꤛꤢꤩ ꤋꤢ꤭ꤜꤟꤢꤩ ꤛꤢꤩ꤭ ꤔꤛꤣ꤬ ꤚꤢꤪ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭ ꤥ꤬ꤑꤢ꤭ꤡꤢꤪ " ꤢ꤬ꤟꤢꤩꤘꤢꤦ꤬꤯
ꤘꤣ ꤢ꤬ꤚꤟꤢꤩ ꤡꤢꤟꤢꤪꤙꤤ ꤐꤥ꤬ꤜꤣꤧ꤬ꤜꤢꤧ꤭ ꤢ꤬ꤋꤢꤧ꤭ ꤜꤟꤢꤩꤗꤟꤢꤩ꤬ꤓꤛꤢ꤬ꤙꤢꤧ ꤒꤟꤢꤧ꤬ꤞꤛꤥꤒꤥ꤭ ꤋꤢ꤭ꤜꤟꤢꤩꤛꤢꤩ꤭ ꤟꤛꤢ꤭ꤗꤟꤢꤩ꤬ ꤚꤢꤦ꤬ꤘꤢꤦ꤭ꤚꤟꤢꤩ ꤟꤢꤩ꤬ꤋꤢꤨ꤬ꤋꤢ꤭ꤜꤟꤢꤩ, ꤓꤢꤟꤛꤢ꤭ꤊꤜꤛꤢ ꤖꤢꤨꤔꤛꤣ꤬ ꤓꤛꤣ꤭ ꤒꤟꤢꤧ꤬ꤒꤢ꤬ꤚꤤ꤬ꤊꤜꤟꤢꤪ꤬ ꤓꤛꤢ꤬ꤛꤢꤩ꤭ ꤒꤢ꤬ꤟꤢꤩ꤬ ꤒꤟꤢꤧ꤬ꤒꤢ꤬ꤘ꤉ꤟꤥ꤭ꤒꤢ꤬ꤘꤤ ꤢ꤬ꤑꤢꤩ꤭ ꤟꤛꤢ꤭ꤘꤛꤢ꤬ꤒꤟꤢ꤭ ꤊꤜꤛꤢꤩ꤭ꤒꤢ ꤋꤗꤛ ꤅꤇꤅ ꤔꤢ ꤋꤗꤛ ꤅꤇꤆ ꤓꤛꤣ꤭ ꤟꤛꤢ꤭ꤘꤛꤢ꤬ꤒꤟꤢ꤭ ꤢꤧꤓꤛꤢ꤬ꤕꤟꤥ ꤋꤗꤛ ꤄꤂꤈ ꤒꤢ ꤛꤢꤩ꤭ꤒꤢ꤬ꤟꤢꤩ꤬ ꤔꤛꤣ꤬ ꤗꤢ꤬ ꤙꤢꤗꤢꤔꤣꤧ꤬ ꤟꤢꤩꤘꤢꤦ꤬꤯
ꤢ꤬ꤟꤢꤩꤡꤛꤣ ꤕꤟꤥ ꤔꤢ ꤒꤟꤢꤧ꤬ꤜꤢ꤬ꤡꤟꤢꤨ ꤊꤛꤢ꤭ꤟꤢꤩ꤬ꤋꤢꤨ꤬ ꤋꤢ꤭ꤜꤟꤢꤩ ꤛꤢꤩ꤭ ꤜꤟꤢꤩꤔꤟꤤꤙꤢꤧ꤬ ꤋꤛꤢꤩ꤭ ꤢ꤬ꤑꤢꤩ꤭ ꤘꤛꤢ꤬ꤓꤛꤢ꤬ ꤒꤟꤢꤧ꤬ꤞꤢꤧꤐꤟꤢꤪ꤬ ꤜꤤ꤬ꤘꤣ ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩ ꤕꤚꤟꤢꤧ꤬ꤋꤛꤢꤋꤢꤨ꤬ ꤐꤥ꤭ꤥ꤬ ꤙꤤ ꤢꤩ꤬ꤕꤚꤤ꤬ꤜꤢꤧ꤭ ꤁꤆ ꤞꤢꤧ꤭ ꤢ꤬ꤋꤢꤧ꤭ ꤔꤛꤣ꤬ ꤗꤢ꤬ꤔꤢ ꤘꤣ ꤕꤚꤟꤢꤧ꤬ꤋꤛꤢꤋꤢꤨ꤬ ꤛꤢꤩ꤭ꤒꤢ꤬ꤟꤢꤩ꤬ ꤒꤢ꤬ꤔꤢꤩ꤬ ꤟꤢꤩꤏꤢꤦ꤬ ꤢꤧ꤬ꤞꤤ꤭ꤜꤤ꤬ꤛꤢꤩ꤭ ꤔꤛꤣ꤬ ꤒꤢ꤬ꤡꤣꤒꤥ꤬꤯
ꤜꤟꤢꤩꤢꤩ꤬ ꤜꤟꤢꤩꤥ꤭ ꤢ꤬ꤑꤢꤩ꤭ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭ ꤥ꤬ꤊꤛꤢ꤭ ꤟꤢꤪꤚꤢꤪ ꤒꤟꤢ꤭ꤟꤛꤢ꤭ꤑꤢꤩ꤭ ꤔꤥ꤬ꤕꤢ꤭ ꤕꤟꤢꤧ꤬ꤒꤥ꤭ꤙꤢꤧ꤬ ꤡꤛꤣꤗꤟꤢꤩ꤬ ꤒꤢ꤬ꤖꤢ꤭ꤐꤟꤛꤢꤩ꤬ꤊꤛꤢ꤭ꤟꤢꤪ ꤜꤟꤢꤩꤤ꤬ꤏꤢꤪ ꤤ꤬ꤕꤜꤢꤦ꤭ ꤒꤟꤢꤧ꤬ꤗꤟꤢꤪ ꤒꤟꤢꤧ꤬ꤙꤥ꤭ ꤋꤢ꤭ꤜꤟꤢꤩ ꤘꤣ ꤢ꤬ꤚꤟꤛꤣ꤬ ꤔꤛꤣ꤬ꤕꤢ꤭ ꤔꤛꤣ꤬ꤗꤢ꤬ ꤘꤢꤪ꤭ꤖꤢꤨꤏꤥ꤬ꤖꤢꤨ ꤥ꤬ꤙꤤ ꤔꤛꤣ꤬ ꤒꤢ꤬ꤟꤢꤩ꤬ ꤟꤢꤩꤘꤢꤦ꤬ꤖꤢꤨꤔꤛꤣ꤬꤯
