ꤕꤚꤟꤢꤧ꤬ꤗꤢꤪ꤬ꤖꤢꤨ ꤡꤛꤣꤥ꤬ ꤙꤤ ꤜꤢ꤬ꤘꤢ꤬ ꤊꤢꤨ꤭ꤜꤢ꤭ꤊꤟꤢꤩ ꤗꤢꤪ꤬ꤗꤟꤌꤣꤙꤢꤨ꤭, ꤢ꤬ꤔꤢ꤬ ꤥ꤬ꤟꤢꤪ ꤂꤄ ꤔꤢ꤬ꤛꤢꤩ꤭ ꤢ꤬ꤗꤟꤢꤩ꤬ꤒꤟꤌꤣꤊꤟꤌꤣ꤭ ꤒꤟꤢꤧ꤬ꤖꤛꤢꤩꤒꤟꤢꤧ꤬ꤗꤟꤢꤩ꤬ ꤔꤢ Burma Campaign UK ꤢ꤬ꤕꤜꤢꤪꤢ꤬ꤗꤟꤢꤨ꤬ ꤔꤛꤣ꤬ ꤚꤢꤪ ꤙꤤ ꤢꤪꤒꤥ꤬ꤙꤢ꤬ꤜꤢꤧ꤭ ꤂꤉ ꤞꤢꤧ꤭ ꤢ꤬ꤋꤢꤧ꤭ ꤢꤧ꤬ꤞꤤ꤭ꤗꤟꤢꤩ꤬ꤜꤢ꤬ꤟꤛꤢ꤭ ꤗꤟꤛꤢ꤬ꤊꤟꤢꤩ ꤒꤟꤢꤧ꤬ꤤ꤬ꤕꤟꤢꤒꤟꤢ꤭ ꤘꤣ ꤊꤟꤣ꤭ꤒꤢ꤬ꤖꤢꤪ꤭ꤊꤢꤨ꤭ ꤔꤢ ꤋꤢꤨ꤬ꤊꤟꤌꤣ ꤜꤢ꤬ꤞꤢꤧ(ꤜꤢꤩ꤬ꤓꤤ꤭) ꤙꤤ UK ꤊꤢꤨ꤭ꤜꤢ꤭ꤙꤢꤨ꤭ꤊꤟꤢꤩ, Kent ꤠꤟꤤ꤭ ꤔꤛꤣ꤬ ꤚꤢꤪ ꤢ꤬ꤕꤢ꤬ꤔꤟꤌꤣ꤭ ꤊꤟꤌꤣ꤭ ꤙꤤꤔꤛꤣ꤬꤯

ꤗꤢꤪ꤬ꤗꤟꤌꤣꤙꤢꤨ꤭ ꤤ꤬ꤕꤟꤢꤒꤟꤢ꤭ ꤋꤢꤨ꤬ꤊꤟꤌꤣ ꤜꤢ꤬ꤞꤢꤧ

“ ꤟꤢꤩ꤬ꤋꤢꤨ꤬ꤏꤤ꤬꤭ꤙꤢ꤬ ꤓꤛꤢꤩ꤭ꤊꤟꤢꤩꤘꤢꤨ꤬ꤒꤢ꤬ꤟꤢꤩ꤬ ꤟꤢꤩꤔꤢ ꤗꤟꤛꤢ꤬ꤊꤟꤢꤩ ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬, ꤒꤢ꤬ꤊꤜꤛꤢ꤬ ꤟꤛꤢ꤭ꤟꤢꤪ, ꤒꤢ꤬ꤘꤣ꤬ꤚꤢꤪ ꤗꤟꤢꤗꤟꤢꤒꤢ꤬ꤋꤥ꤭ ꤗꤛꤢꤩ꤭ꤡꤣ꤬ꤖꤢꤨ ꤒꤢ꤬ꤊꤜꤢꤪꤥ꤬ꤘꤛꤢꤩ ꤋꤢ꤭ꤜꤟꤢꤩ ꤔꤛꤣ꤬ ꤒꤢ꤬ꤊꤜꤛꤢ꤬ꤚꤛꤢꤓꤛꤢ꤬ ꤊꤟꤌꤣ꤭ꤜꤢ꤭ꤟꤤꤒꤥ꤬, ꤛꤢꤩ꤭ꤔꤛꤣ꤬ ꤢ꤬ꤋꤢꤨ꤬ꤢ꤬ꤑꤢꤩ꤭ ꤠꤢ꤭ ꤞꤢꤧꤐꤟꤢꤦ ꤘꤛꤢꤩꤞꤢꤧꤑꤢꤩ꤭ ꤊꤟꤌꤣ꤭ ꤓꤛꤢꤩ꤭ꤊꤟꤢꤩꤘꤢꤨ꤬ ꤒꤢ꤬ꤊꤜꤢꤪ, ꤓꤛꤣ꤭ ꤠꤢ꤭ ꤤ꤬ꤕꤟꤢꤒꤟꤢ꤭ ꤛꤢꤩ꤭ꤔꤛꤣ꤬ ꤗꤟꤢꤘꤣ ꤢ꤬ꤋ꤉ꤢꤢ꤬ꤛꤢ꤬ ꤥ꤬ꤊꤟꤌꤣ꤭ ꤜꤟꤢꤩꤟꤢꤩꤙꤢꤧ꤬ꤙꤢꤧ ꤊꤟꤌꤣ꤭ ꤕꤟꤢꤧ꤬ꤊꤢ꤬ꤛꤢ꤭ꤜꤟꤤ꤬ꤖꤢꤨ ꤢ꤬ꤚꤢꤩ꤬ ꤖꤢꤨꤔꤛꤣ꤬ " ꤔꤛꤣ꤬ꤗꤢ꤬ ꤕꤚꤟꤢꤧ꤬ꤡꤛꤣ ꤟꤢꤩꤞꤛꤥ ꤒꤟꤢꤧ꤬ꤞꤤꤖꤢꤧ ꤘꤣ ꤢꤩ꤬ꤊꤢ꤬ꤜꤢ꤬ (ꤊꤢꤨ꤭ꤜꤢ꤭ꤊꤟꤢꤩ )ꤗꤢꤪ꤬ꤗꤟꤌꤣꤙꤢꤨ꤭ ꤟꤢꤩꤕꤟꤢꤩꤘꤢꤦ꤬ꤖꤢꤨꤔꤛꤣ꤬꤯

ꤕꤢ꤬ꤊꤢꤦ꤭, ꤊꤢ꤬ꤛꤢ꤭ꤜꤟꤤ꤬, ꤊꤢ꤬ꤡꤏꤢꤩ꤬, ꤕꤚꤟꤢꤩꤔꤥ ꤗꤛꤢꤩ꤭ꤡꤣ꤬ ꤛꤢꤩ꤭ꤒꤢ꤬ꤟꤢꤩ꤬ ꤗꤟꤛꤢ꤬ꤊꤟꤢꤩꤋ꤉ꤤ ꤙꤢꤪꤞꤛꤥꤙꤢꤪꤋꤥ꤭ ꤒꤟꤢ꤭ꤛ꤉ꤥ꤬ ꤔꤛꤢ꤬ꤡꤢꤪ ꤢꤧ꤬ꤞꤤ꤭, ꤖꤢꤨꤊꤜꤛꤢꤩ꤭ ꤒꤟꤢꤧ꤬ꤗꤟꤢꤩ꤬ꤡꤛꤢꤩ꤭ꤗꤟꤢꤩ꤬ꤔꤢ꤬, ꤓꤛꤣ꤭ ꤊꤜꤛꤢꤩ꤭ ꤒꤟꤢꤧ꤬ꤒꤢ꤬ꤚꤤ꤬ ꤏꤢꤨꤏꤢ, ꤓꤛꤢꤩ꤭ꤊꤟꤢꤩ ꤏꤛꤣꤋꤢꤧ꤭ ꤓ꤉ꤟꤥ꤭ꤓꤛꤢ꤬ ꤒꤢ꤬ꤟꤢꤩ꤬ ꤛꤢꤩ꤭ ꤓꤛꤢꤩ꤭ꤊꤟꤢꤩꤚꤟꤛꤣ꤬ ꤒꤢ꤬ꤟꤢꤩ꤬ ꤊꤣꤚꤟꤢꤩ  ꤗꤛꤢꤓꤛꤢꤩ꤬ ꤞꤢꤧꤐꤟꤢꤪ꤬ ꤗꤟꤢꤩ꤬ꤡ꤉ꤟꤥ ꤊꤟꤌꤣ꤭ꤢ꤬ꤑꤢꤩ꤭ Burma Campaign Uk ꤜꤟꤢꤩꤔꤟꤤ ꤒꤟꤢꤧ꤬ꤗꤟꤢꤩ꤬ꤜꤢꤨ꤭ ꤗꤟꤢꤩ꤬ꤞꤛꤢ ꤚꤢꤦ꤭ funding ꤢꤧ꤬ꤞꤤ꤭ ꤑꤢꤩ꤭ ꤔꤛꤣ꤬ꤗꤢ꤬ ꤗꤢꤪ꤬ꤗꤟꤌꤣꤙꤢꤨ꤭ ꤟꤢꤩꤏꤥ꤬ꤡꤛꤣ ꤘꤢꤦ꤬ꤖꤢꤨꤔꤛꤣ꤬꤯

ꤛꤢꤩ꤭ꤔꤛꤣ꤬ꤗꤢ꤬ ꤗꤢꤪ꤬ꤗꤟꤛꤣꤙꤢꤨ꤭ ꤢ꤬ꤑꤢꤩ꤭ ꤒꤟꤢꤧ꤬ꤤ꤬ꤕꤟꤢꤒꤟꤢ꤭ ꤢ꤬ꤚꤟꤢꤩ ꤊꤢ꤬ꤜꤢꤨꤜꤣ ꤢ꤬ꤟꤢꤩꤘꤢꤦ꤬꤯

“ ꤖꤢꤦ꤬ꤤ꤬ꤏꤢ꤬ꤒꤟꤢ꤭ ꤢ꤬ꤋꤢꤧ꤭ ꤞꤢꤧꤤ꤬ꤏꤢꤩ꤭ ꤔꤛꤢ꤬ꤡꤢꤪ, ꤗꤛꤢꤓꤛꤢꤩ꤬ ꤒꤟꤢ꤭ꤕꤢ꤭ꤡꤢꤪ ꤟꤢꤩ꤬ꤋꤢꤨ꤬ꤒꤥ꤬, ꤢ꤬ꤒꤢ꤬ꤡꤣ ꤑꤢ꤬ꤡꤢꤪꤡꤢꤪ, ꤢ꤬ꤞꤛꤢ ꤔꤢ ꤢꤨ꤭ꤠꤤ꤭ꤒꤟꤢ꤭ ꤠꤢ꤭ ꤖꤢꤨꤔꤛꤣ꤬, ꤙꤤ ꤓꤢꤪꤒꤢ꤬ꤘꤛꤢ꤭ꤓꤢꤩ꤬ ꤟꤢꤪ ꤋꤢꤨ꤬ꤊꤟꤌꤣ ꤜꤢ꤬ꤞꤢꤧ (ꤜꤢꤩ꤬ꤓꤤ꤭)ꤔꤛꤣ꤬ ꤢ꤬ꤋꤢꤧ꤭ ꤞꤢꤧꤘꤥ꤭ꤘꤥ꤭ ꤢ꤬ꤒꤟꤢ꤭ ꤖꤢꤨꤔꤛꤣ꤬ ꤚꤢꤪ ꤗꤛꤢꤓꤛꤢꤩ꤬ꤒꤟꤢ꤭ ꤋꤛꤢꤩ꤭ꤊꤟꤌꤣ꤭ ꤟꤢꤩ꤬ꤋꤢꤨ꤬, ꤢ꤬ꤞꤛꤢ ꤔꤢ ꤠꤢ꤭ ꤕꤟꤢꤦꤗꤢ꤬ ꤙꤢꤧ꤬ ꤔꤟꤤꤊꤛꤢ꤭  ꤒꤟꤢꤧ꤬ꤒꤢ꤬ꤡꤣ꤬ꤡꤣ꤬ ꤖꤢꤨꤔꤛꤣ꤬, ꤢ꤬ꤒꤢ꤬ꤡꤣ ꤜꤢ꤭, ꤓꤛꤣ꤭ ꤓꤢꤪꤒꤢ꤬ꤘꤛꤢ꤭ꤓꤢꤩ꤬ ꤟꤢꤪ ꤋꤢꤨ꤬ꤊꤟꤌꤣ ꤜꤢ꤬ꤞꤢꤧ (ꤜꤢꤩ꤬ꤓꤤ) ꤛꤢꤩ꤭ ꤔꤛꤣ꤬ꤢ꤬ꤋꤢꤧ꤭ ꤢ꤬ꤗꤟꤥ꤬ꤜꤢ꤭ ꤕꤚꤢꤧꤠꤢ " ꤔꤛꤣ꤬ ꤗꤢ꤬ ꤗꤢꤪ꤬ꤗꤟꤌꤣꤙꤢꤨ꤭ ꤟꤢꤩꤏꤥ꤬ꤘꤛꤢꤩꤖꤢꤨꤔꤛꤣ꤬꤯

ꤗꤢꤪ꤬ꤗꤟꤌꤣꤙꤢꤨ꤭ ꤥ꤬ꤕꤢ꤬ꤡꤟꤢꤧꤜꤟꤛꤢ꤬ ꤙꤤ ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩ ꤘꤤ꤭ꤗꤟꤢꤪꤏꤥ꤬ ꤠꤟꤤ꤭ꤗꤣ꤭ꤊꤢꤨ꤭ ꤔꤛꤣ꤬ꤓꤛꤣ꤭ ꤗꤟꤢꤘꤣ ꤗꤟꤛꤢ꤬ꤊꤜꤛꤢꤩ꤭ ꤢ꤬ꤒꤟꤢꤧ꤬ꤗꤟꤢꤩ꤬ꤕꤟꤛꤢꤗꤟꤢꤩ꤬ꤏꤢꤧ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤓꤢꤩ꤬ꤊꤜꤛꤢ꤬ ꤟꤛꤢ꤭ꤥ꤬ ꤘꤣ ꤕꤚꤟꤢꤧ꤬ꤙꤢꤧ꤬ꤕꤟꤛꤢꤙꤢꤧ꤬ꤏꤢꤧ꤭ ꤋꤢ꤭ꤜꤟꤢꤩ ꤖꤢꤨꤔꤛꤣ꤬ ꤢ꤬ꤟꤢꤩꤘꤢꤦ꤬꤯

ꤟꤛꤢ꤭ꤥ꤬ꤑꤢꤩ꤭ꤒꤟꤢ꤬ ꤟꤤꤙꤤ ꤋꤢ꤭ꤜꤟꤢꤩꤔꤛꤣ꤬ꤒꤥ꤬ ꤚꤢꤪ ꤢꤧ꤬ꤔꤟꤤꤙꤢꤧ꤬ ꤢ꤬ꤋ꤉ꤢꤢ꤬ꤛꤢ꤬ ꤘꤣ ꤡꤛꤣꤟꤢꤩ ꤒꤟꤢꤧ꤬ꤞꤤꤖꤢꤧꤘꤣ ꤊꤢꤨ꤭ꤜꤢ꤭ꤊꤟꤢꤩ (ꤢꤩ꤬ꤊꤢ꤬ꤜꤢ꤬ ꤊꤟꤢꤩ) ꤔꤛꤣ꤬ꤓꤛꤣ꤭ ꤛꤢꤩ꤭ꤋꤥ꤭ꤑꤟꤢ ꤢꤧ꤬ꤓꤛꤢ꤬ ꤟꤢꤩꤞꤛꤥ ꤒꤟꤥꤓꤢꤨ꤭ꤞꤛꤥꤜꤤ꤬ꤟꤥ꤭ ꤔꤛꤣ꤬ꤚꤢꤪ ꤢ꤬ꤖꤛꤢꤩꤘꤢꤦ꤬ ꤒꤟꤢꤧ꤬ꤋꤢꤨ꤬ ꤞꤢꤚꤢꤗꤟꤌꤣ  (ꤊꤢꤨ꤭ꤜꤢ꤭ꤢꤧ꤬ ꤔꤢ ꤔꤢꤣ) ꤜꤤ꤬ꤋꤢ꤭ꤏꤛꤢꤩ ꤢ꤬ꤔꤥ꤬ꤜꤣ ꤒꤣ꤬ꤔꤢ꤬ ꤔꤛꤣ꤬ꤕꤚꤢꤧ꤯