ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤘꤣ ꤗꤢꤪ꤬ꤡꤏꤤꤠꤟꤤ꤭ ꤔꤛꤣ꤬ ꤕꤚꤟꤢꤧ꤭ꤊꤢꤨ꤭ ꤒꤟꤢꤧ꤬ꤒꤢ꤬ꤘ꤉ꤟꤥ꤭ꤒꤢ꤬ꤘꤤ ꤢ꤬ꤑꤢꤩ꤭ ꤗꤟꤛꤢ꤬ꤊꤟꤢꤩꤋ꤉ꤤ ꤢ꤬ꤕꤜꤢꤦ꤭ꤒꤟꤢ꤭ ꤗꤤ꤬ꤕꤟꤢꤪ ꤟꤢꤩ꤬ꤜꤢꤧ꤭ ꤚꤢꤪ ꤘꤢꤪ꤭ꤖꤢꤨꤏꤥ꤬ꤖꤢꤨ ꤕꤟꤢꤨꤕꤢ꤬ꤔꤟꤢꤧ ꤐꤟꤤꤙꤢꤧ꤬ꤞꤛꤢꤩ꤭ ꤒꤢ꤬ꤗꤥ꤭ ꤖꤢꤨꤔꤛꤣ꤬꤯
ꤘꤣ ꤢ꤬ꤚꤟꤢꤩ ꤢꤪꤒꤥ꤬ꤙꤢ꤬ꤜꤢꤧ꤭ ꤁꤃ ꤞꤢ꤭ꤧ ꤢ꤬ꤋꤢꤧ꤭ ꤘꤣ ꤗꤢꤪ꤬ꤡꤏꤤꤠꤟꤤ꤭ ꤙꤢꤧꤋꤛꤢꤩ꤭ ꤒꤢ꤬ꤊꤛꤢꤩ꤭ ꤒꤢ꤬꤉ꤢ꤬ꤒꤢꤩ꤬ꤒꤢ꤬ (ꤜꤢꤧ꤬ꤒꤢ꤬) ꤗꤟꤛꤢ꤬ꤊꤜꤛꤢꤩ꤭ ꤋꤜꤛ ꤇꤂ ꤔꤛꤣ꤬ ꤤ꤬ꤕꤜꤢꤦ꤭ꤒꤟꤢ꤭ ꤗꤤ꤬ꤕꤟꤢꤪ ꤟꤢꤩ꤬ꤜꤟꤢꤧ꤭ ꤔꤛꤣ꤬ꤚꤢꤪ ꤕꤟꤢꤨꤗꤟꤌꤣꤘꤢꤨ꤬ ꤒꤢ꤬ꤘꤟꤛꤣ꤭ ꤕꤟꤢꤪꤙꤢꤧ꤬ꤕꤟꤢꤪ ꤊꤛꤢ꤭ ꤓꤛꤣ꤭ ꤢ꤬ꤙꤢꤧ꤬ꤒꤢ꤬ꤗꤢꤧ꤬ ꤔꤟꤤꤊꤛꤢ꤭ ꤔꤛꤣ꤬ꤗꤢ꤬ ꤊꤢꤪ꤬ꤒꤢꤨ꤬ꤘꤥ ꤘꤢꤪ꤭ꤖꤢꤨꤏꤥ꤬ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩꤏꤥ꤬ꤘꤢꤦ꤬ ꤖꤢꤨꤔꤛꤣ꤬꤯
ꤢ꤬ꤟꤢꤩꤔꤢ “ ꤗꤟꤛꤢ꤬ꤊꤟꤢꤩꤋ꤉ꤤ ꤊꤜꤛꤢꤩ꤭ꤛꤢꤩ꤭ ꤢꤧ꤬ꤞꤤ꤭ ꤟꤢꤩꤏꤥ꤬ ꤜꤟꤛꤣ꤭ꤕꤜꤤ ꤕꤚꤢꤧꤠꤢ꤭, ꤛꤢꤩ꤭ꤋꤥ꤭ꤑꤟꤢ ꤊꤢꤧꤙꤟꤌꤣ ꤢ꤬ꤏꤛꤣꤢ꤬ꤋꤢꤧ꤭ ꤚꤢꤪ ꤜꤟꤢꤩꤗꤛꤢꤋ꤉ꤢ꤬ꤧꤔꤟꤤ ꤕꤟꤢꤨꤕꤢ꤬ꤔꤟꤢꤧ ꤔꤛꤣ꤬ ꤢ꤬ꤏꤛꤣꤢ꤬ꤋꤢꤧ꤭ ꤥ꤬ꤒꤥ꤬ " ꤢ꤬ꤟꤢꤩꤘꤢꤦ꤬꤯
ꤙꤤ ꤂꤀꤁꤀-꤁꤁ ꤔꤢ꤬ꤢ꤬ꤊꤢꤨ꤭ ꤓꤛꤢꤩ꤭ꤊꤟꤢꤩꤚꤢꤩ꤬ ꤢ꤬ꤋꤥ꤭ ꤗꤟꤛꤢ꤬ꤊꤟꤢꤩꤋ꤉ꤤ ꤊꤜꤛꤢꤩ꤭ꤒꤢ ꤘꤛꤢ꤬ꤒꤟꤢ꤭ ꤒꤢ꤬ꤠꤟꤤ꤭ ꤒꤢ꤬ꤠꤟꤢ꤬ ꤜꤟꤢꤪ꤭ꤘꤢꤦ꤬ ꤗꤤ꤬ꤕꤟꤢꤪ ꤟꤢꤩ꤬ꤜꤟꤢꤧ꤭ ꤔꤛꤣ꤬ꤗꤢ꤬ ꤕꤚꤟꤢꤧ꤬ꤋꤛꤢꤋꤢꤨ꤬ ꤥ꤬ ꤘꤣ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤢ꤬ꤗꤢ ꤂ ꤒꤢ꤬ꤤ꤬ ꤢ꤬ꤊꤢꤨ꤭ ꤒꤣ꤬ꤕꤚꤟꤢꤧ꤬ ꤟꤢꤩꤏꤥ꤬ꤔꤟꤤ ꤘꤢꤦ꤬ ꤖꤢꤨꤛꤢꤩ꤭꤯
ꤢ꤬ꤟꤢꤩꤔꤢ “ ꤕꤟꤢꤧ꤬ꤓꤛꤢꤩ꤭ꤊꤟꤢꤩꤖꤢꤨꤜꤟꤛꤢꤩ꤬ ꤔꤢ ꤊꤜꤛꤢꤩ꤭ꤒꤢꤛꤢꤩ꤭ ꤢ꤬ꤥ꤬ꤖꤢꤦ꤬ꤥ꤬ꤥ ꤜꤢꤨ꤭ꤕꤚꤢꤧ, ꤘꤣ ꤊꤜꤛꤢꤩ꤭ꤛꤢꤩ꤭ꤒꤢ꤬ꤟꤢꤩ꤬ ꤔꤛꤣ꤬ ꤢ꤬ꤥ꤬ꤘꤢꤦ꤬ ꤘꤣ ꤒꤢ꤬ꤚꤢꤧꤊꤢꤨ꤭ ꤖꤢꤨꤔꤛꤣ꤬꤯ ꤘꤢꤪ꤭ꤖꤢꤨꤏꤥ꤬ꤖꤢꤨ ꤒꤢ꤬ꤟꤢꤩ꤬ ꤥ꤬ꤕꤚꤢꤧꤘꤣ ꤒꤢ꤬ꤚꤢꤧ ꤢ꤬ꤊꤜꤢꤪ꤭ꤕꤚꤢꤧ ꤚꤢꤪ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤐꤟꤢꤦ ꤢ꤬ꤥ꤬ꤢꤧꤑꤢ꤬ꤡꤢꤪ, ꤘꤣ ꤊꤢ꤬ꤛꤢ꤭ꤔꤛꤣ꤬ ꤢ꤬ꤡꤛꤣꤋꤥ ꤡꤟꤛꤢꤕꤚꤢꤧ ꤗꤢ꤬ꤔꤢ ꤘꤣ ꤕꤟꤢꤨꤕꤢ꤬ꤔꤟꤢꤧ ꤜꤟꤢꤩꤢꤩ꤬ꤏꤢꤧ꤬ꤢꤩ꤬ ꤢ꤬ꤋꤢ꤭ꤜꤟꤢꤩ ꤔꤛꤣ꤬ ꤤ꤬ꤕꤜꤢꤦꤒꤟꤢ꤭ ꤏꤛꤣ꤭ꤏꤢꤦꤡꤢꤪ ꤗꤤ꤬ꤕꤟꤢꤪ ꤟꤢꤩ꤬ꤜꤟꤢꤧ꤭ ꤕꤚꤢꤧꤔꤤ꤭ " ꤢ꤬ꤟꤢꤩꤘꤢꤦ꤬꤯
ꤊꤢ꤬ꤛꤢ꤭ꤥ꤬ꤖꤢꤦ꤬ ꤒꤢ꤬ꤠꤤ꤭ꤒꤢ꤬ꤠꤟꤢ꤬ ꤔꤢ ꤗꤢꤪ꤬ꤡꤏꤤꤠꤟꤤ꤭ ꤘꤢꤪ꤭ꤖꤢꤨꤏꤥ꤬ꤖꤢꤨ ꤛꤢꤩ꤭ ꤢꤧꤒꤢ꤬ꤊꤤ꤬ ꤢꤧ꤬ꤞꤤ꤭ꤗꤟꤢꤩ꤬ ꤢꤩ꤬ꤕꤚꤟꤢꤧ꤭ ꤔꤢ ꤟꤛꤢ꤭ꤢꤩ꤬ꤋꤢꤨ꤬ꤊꤜꤢꤧ꤭ ꤒꤟꤢꤧ꤬ꤖꤛꤢꤩ ꤒꤟꤢꤧ꤬ꤗꤟꤢꤩ꤬ ꤖꤢꤨꤔꤛꤣ꤬꤯
ꤘꤣ ꤗꤢꤪ꤬ꤡꤏꤤ ꤔꤛꤣ꤬ ꤗꤟꤛꤢ꤬ꤊꤜꤛꤢꤩ꤭ꤋ꤉ꤤꤒꤢ ꤢ꤬ꤗꤟꤢ ꤉꤄ ꤗꤣꤧ꤬ ꤒꤢ, ꤒꤢ꤬ꤍꤢꤨ꤭ꤏꤥ꤬(ꤓꤢꤩꤛꤢꤨꤒꤢꤪ꤬) ꤒꤢ, ꤡꤢꤪꤒꤢꤪ꤬ ꤒꤢ, ꤔꤢ ꤜꤢꤧ꤬ꤒꤢ꤬ ꤒꤢ, ꤢ꤬ꤗꤢ ꤂ ꤒꤢ, ꤕꤢꤩ꤬ꤗꤢꤊꤥ꤭ ꤒꤢ ꤒꤢ꤬ꤟꤢꤩ꤬ ꤚꤢꤪ ꤖꤢꤨ ꤕꤢꤩ꤬ꤗꤢꤊꤥ꤭ ꤒꤢ, ꤡꤢꤪꤒꤢꤪ꤬ ꤒꤢ ꤔꤢ ꤒꤢ꤬꤉ꤢ꤬ꤒꤢꤩ꤬ꤒꤢ꤬ ꤒꤢ ꤥ꤬ꤘꤣ ꤙꤢꤧꤑꤢꤩ꤭ ꤒꤢ꤬ꤟꤢꤩ꤬ ꤘꤛꤢ꤬ꤒꤟꤢ꤭ꤥ꤬ ꤗꤤ꤬ꤕꤟꤢꤪ ꤟꤢꤩ꤬ꤜꤟꤢꤧ꤭ ꤔꤛꤣ꤬ ꤢ꤬ꤥ꤬ ꤡꤟꤛꤢꤡꤢꤪ ꤘꤣ ꤢ꤬ꤚꤤꤊꤢꤨ꤭ꤡꤢꤪ꤯
ꤘꤣ ꤢ꤬ꤚꤟꤢꤩ ꤎꤢꤧꤒꤢꤩ꤬ꤙꤢ꤬ꤜꤢꤧ꤭ ꤢ꤬ꤊꤢꤨ꤭ ꤗꤢꤪ꤬ꤡꤏꤤꤘꤢꤪ꤭ꤜꤟꤢꤧ꤭, ꤊꤢꤪ꤬ꤒꤢꤨ꤬ꤘꤥ꤭ ꤔꤢ ꤙꤢꤨ꤭ꤜꤢꤪ꤬ꤕꤢꤧ꤬ꤘꤢꤪ꤭ ꤘꤢꤪ꤭ꤖꤢꤨꤏꤥ꤬ꤖꤢꤨ ꤕꤟꤢꤨꤕꤢ꤬ꤔꤟꤢꤧ ꤒꤢ꤬ꤟꤢꤩ꤬ ꤤ꤬ꤐꤟꤤꤙꤢꤧ꤬ ꤗꤤ꤬ꤕꤟꤢꤪ ꤟꤢꤩ꤬ꤜꤟꤢꤧ꤭ ꤄ ꤕꤜꤢꤪ꤬ꤚꤢꤪ ꤕꤢ꤬ꤔꤟꤢꤧ ꤒꤣ꤬ꤘꤟꤛꤣ꤭, ꤕꤟꤢꤨ ꤔꤛꤢꤩ꤭ꤘꤟꤛꤣ꤭ ꤢ꤬ꤞꤛꤢꤩ꤭ꤊꤛꤢ꤭ ꤓꤛꤣ꤭ ꤢ꤬ꤙꤢꤧ꤬ꤒꤢ꤬ꤗꤢꤧ꤬ꤔꤟꤤꤕꤢ꤭ ꤒꤢ꤬ꤟꤢꤩ꤬ꤟꤢꤩ꤬꤯
ꤙꤤ ꤢ꤬ꤔꤢ꤬ ꤂꤀꤁꤁ ꤔꤢ꤬ ꤢ꤬ꤊꤢꤨ꤭ ꤗꤢꤜꤢꤧ꤭ ꤂꤂ꤞꤢꤧ꤭ ꤢ꤬ꤋꤢꤧ꤭ ꤔꤛꤣ꤬ ꤗꤢꤪ꤬ꤡꤏꤤ ꤘꤢꤪ꤭ꤊꤢꤨ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤤ꤬ꤐꤟꤤꤙꤢꤧ꤬ ꤞꤛꤢꤩ꤭ꤊꤛꤢ꤭ ꤢ꤬ꤔꤟꤢꤩ ꤔꤢ ꤗꤤ꤬ꤕꤟꤢꤪ ꤟꤢꤩ꤬ꤜꤟꤢꤧ꤭ ꤛꤢꤩ꤭ꤔꤛꤣ꤬ꤕꤚꤢꤧ꤯
