ꤞꤢꤧꤑꤢꤩ꤭ꤔꤟꤤ ꤒꤟꤢꤧ꤬ꤚꤢꤩ꤬ ꤔꤢ ꤘꤣ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤞꤤꤚꤤꤘꤢꤪ꤭ ꤠꤟꤤ꤭ꤊꤢꤨ꤭ ꤞꤛꤥꤜꤤ꤬ꤟꤥ꤭ꤖꤢꤨ ꤒꤢ꤬ꤟꤢꤩ꤬ ꤔꤢꤪ꤭ꤢꤩ꤬ꤥ꤭ ꤏꤢꤪ꤭ꤓꤛꤢ꤬ꤜꤢ꤭ ꤒꤟꤢꤧ꤬ꤋꤢꤨ꤬ ꤒꤢ꤬ꤞꤎꤤ ꤚꤢꤪ ꤗꤟꤌꤣꤖꤢꤧ꤭ ꤒꤢ꤬ꤟꤢꤩ꤬ ꤟꤢꤩꤕꤟꤢꤩꤕꤣꤕꤟꤢꤩ ꤘꤛꤢꤩꤕꤢ꤭ ꤢ꤬ꤖꤢꤨꤢ꤬ꤜꤟꤛꤢꤩ꤬ꤒꤥ꤬ ꤟꤢꤩꤘꤢꤦ꤬꤯
ꤞꤢꤧꤑꤢꤩ꤭ ꤔꤟꤤꤕꤟꤥ ꤒꤟꤢꤧ꤬ꤚꤢꤩ꤬ ꤘꤣ ꤞꤛꤥꤜꤤ꤬ꤟꤥ꤭ꤖꤢꤨ ꤗꤟꤌꤣꤖꤢꤧ꤭ ꤥ꤬ ꤔꤢ ꤛꤢ꤬ꤙꤢ ꤒꤟꤢꤧ꤬ꤋꤢꤨ꤬ ꤒꤢ꤬ꤞꤎꤤ ( ꤒꤟꤢꤧ꤬ꤋꤢꤨ꤬ ꤞꤢꤧꤕꤜꤢꤪꤏ꤉ꤟꤥ꤬)ꤛꤢꤩ꤭ ꤒꤟꤥꤓꤢꤨ꤭ ꤞꤛꤥꤜꤤ꤬ꤟꤥ꤭ꤖꤢꤨ, ꤒꤟꤥ ꤁꤀ ꤞꤛꤥꤜꤤ꤬ꤟꤥ꤭ꤖꤢꤨ ꤒꤢ꤬ꤟꤢꤩ꤬ ꤔꤢ ꤕꤢ꤬ꤡꤟꤢꤧ ꤁꤄ ꤔꤢ꤬ ꤒꤢ꤬ꤟꤢꤩ꤬ ꤢ꤬ꤥ꤬ꤕꤢ꤭ ꤒꤟꤥꤊꤜꤢ꤭ꤗꤢꤩ꤭ ꤞꤛꤥꤜꤟꤤ꤬ꤟꤥ꤭ꤖꤢꤨ ꤒꤢ꤬ꤟꤢꤩ꤬ ꤔꤢꤪ꤭ꤢꤩ꤬ꤥ꤭ꤏꤢꤪ꤭ ꤓꤛꤢ꤬ꤜꤢ꤭ ꤯
ꤕꤚꤟꤢꤧ꤬ꤥ꤬ꤙꤤ ꤞꤤꤚꤤꤘꤢꤪ꤭ ꤒꤢ꤬ꤕꤚꤟꤢꤧ꤬ ꤟꤢꤩꤔꤢ “ꤕꤢ꤬ꤡꤟꤢꤧ ꤘꤣ ꤢ꤬ꤥ꤭ꤡ꤉ꤢꤧ꤭ ꤛꤢ꤬ꤙꤢ ꤒꤟꤢꤧ꤬ꤋꤢꤨ꤬ ꤛꤢꤩ꤭ꤔꤛꤣ꤬ ꤢ꤬ꤓ꤉ꤟꤥ꤭ ꤡꤢꤪꤙꤢꤒꤢꤩ꤭ ꤟꤢꤩꤗꤢ꤬ ꤊꤟꤢꤦꤚꤟꤢꤩ ꤗꤟꤢꤩ꤬ꤞꤛꤢꤩ꤭ꤋꤛꤢꤩ꤭ꤡꤢꤪ ꤢꤧ꤬ꤞꤤ꤭ꤗꤟꤌꤣ ꤙꤢꤔꤛꤣ꤬ " ꤔꤛꤣ꤬ ꤗꤢ꤬ ꤢ꤬ꤟꤢꤩꤕꤟꤢꤩꤘꤢꤦ꤬ ꤖꤢꤨꤔꤛꤣ꤬꤯
ꤐꤢꤩ꤬ꤕꤚꤟꤥ꤬ꤙꤛꤢ꤬ꤡꤢꤧ꤬ ꤒꤟꤢꤧ꤬ꤟꤢꤩꤒꤟꤢ꤭ꤒꤟꤢꤦ꤭ ꤗꤢ꤬ ꤢ꤬ꤥ꤬ꤠꤢ, ꤗꤢ꤬ꤔꤢ ꤞꤛꤥꤜꤤ꤬ꤟꤥ꤭ꤖꤢꤨ ꤒꤢ꤬ꤊꤜꤢꤪ ꤤ꤬ꤏꤢꤧ꤭ꤤ꤬ꤕꤚꤟꤤ꤬ ꤋꤛꤢꤩ꤭ꤜꤢꤨ꤭ ꤒꤟꤢꤧ꤬ꤋꤢꤨ꤬ꤛꤢꤩ꤭ ꤔꤢ ꤒꤟꤢꤧ꤬ꤚꤢꤩ꤬ ꤢ꤬ꤡꤣ꤬ꤡꤣ꤬, ꤒꤟꤢꤧ꤬ꤋꤢꤨ꤬ꤛꤢꤩ꤭ ꤢ꤬ꤞꤛꤢ ꤔꤢ ꤤ꤬ꤞꤢꤧ꤬ꤏꤢꤦ꤭ꤕꤜꤢꤪ꤬ ꤞꤢꤧꤑꤢꤩ꤭ꤔꤟꤤ ꤖꤢꤨꤔꤛꤣ꤬꤯
ꤞꤤꤚꤤꤘꤢꤪ꤭ ꤞꤛꤥꤜꤤ꤬ꤟꤥ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩ ꤔꤢ “ ꤊꤤ꤬ꤘꤢ꤭ ꤗꤟꤢꤩ꤬ꤙꤢꤧ꤬ꤜꤤ꤬ ꤒꤥ꤬ꤟꤢꤪꤗꤢ꤬ ꤢꤩ꤬ꤥ꤭ꤟꤢꤪꤒꤟꤢꤧ꤬ꤋꤢꤨ꤬ꤛꤢꤩ꤭, ꤛꤢꤩ꤭ꤒꤢ꤬ꤔꤢ꤬ ꤢ꤬ꤥ꤬ꤢꤧꤓꤛꤢ꤬ꤜꤣ ꤊꤛꤢ꤭ꤟꤢꤪ ꤔꤢ ꤘꤣ ꤔꤢ꤬ꤟꤢꤩꤔꤢꤨ꤬ ꤔꤢ꤬ꤢꤊꤣ꤭ꤔꤢꤨ꤬ ꤔꤛꤣ꤬ꤟꤢꤪ, ꤒꤟꤢꤧ꤬ꤕꤛꤢꤩꤒꤟꤢꤧ꤬ꤊꤛꤢ꤭ ꤥ꤬ꤢꤧꤜꤣ ꤊꤛꤢ꤭ꤟꤢꤪ " ꤢ꤬ꤟꤢꤩꤘꤢꤦ꤬꤯
“ ꤕꤚꤟꤢꤧ꤬ꤥ꤭ꤡ꤉ꤢꤧ꤭ ꤒꤟꤢꤧ꤬ꤋꤢꤨ꤬ ꤒꤢ꤬ꤞꤎꤤ ꤛꤢꤩ꤭ ꤢ꤬ꤙꤢꤧ꤬ꤏꤢꤧ꤭ꤔꤛꤢ꤬ꤡꤢꤪ ꤢ꤬ꤓ꤉ꤟꤥ꤭ꤗꤟꤌꤣꤖꤢꤧ꤭ ꤒꤢ꤬ꤊꤜꤢꤪ ꤒꤟꤢꤧ꤬ꤚꤟꤛꤢ꤬ꤔꤟꤤꤓꤛꤢ꤬ ꤔꤢ ꤢꤧ꤬ꤞꤤ꤭ ꤕꤚꤟꤢꤧ꤬ꤜꤟꤢꤨ꤬ꤚꤢꤩ꤬ ꤒꤟꤢꤧ꤬ꤊꤢ꤬ꤓꤢꤪ꤬ ꤥ꤬ꤔꤛꤢ꤭ ꤖꤢꤨꤔꤛꤣ꤬, ꤓꤛꤣ꤭ ꤕꤢ꤬ꤡꤟꤢꤧ꤬ꤘꤢꤨ꤬ꤓꤛꤢ꤬ꤞꤢꤧ꤭ ꤛꤢꤩ꤭ ꤒꤢ꤬ꤟꤢꤩ꤬ ꤢ꤬ꤑꤢꤩ꤭ ꤢ꤬ꤙꤢꤧ꤬ꤏꤢꤧ꤭ꤒꤟꤛꤣ ꤢꤧ꤬ꤞꤤ꤭ ꤒꤟꤢꤧ꤬ꤞꤤꤖꤢꤧ ꤖꤢꤨꤔꤛꤣ꤬ " ꤔꤛꤣ꤬ꤗꤢ꤬ ꤗꤟꤌꤣꤖꤢꤧ꤭ ꤒꤢ꤬ꤕꤚꤟꤢꤧ꤬ ꤟꤢꤩꤕꤟꤢꤩꤘꤢꤦ꤬꤯
ꤟꤢꤩ ꤔꤢ ꤕꤢ꤬ꤡꤟꤢꤧ ꤞꤛꤥꤜꤤ꤬ꤟꤥ꤭ꤖꤢꤨ ꤔꤢꤪ꤭ꤢꤩ꤬ ꤒꤟꤢꤧ꤬ꤋꤢꤨ꤬ꤗꤟꤢꤦ꤬ꤕꤛꤢꤩ꤭ ꤛꤢꤩ꤭ ꤗꤟꤢꤘꤣ ꤢꤧ꤬ꤞꤤ꤭ ꤜꤟꤢꤦ꤬ꤜꤢꤧꤊꤟꤌꤣ꤭ ꤜꤤ꤬ꤒꤥ꤬, ꤒꤢ꤬ꤟꤢꤩ꤬ꤟꤢꤩ꤬ ꤗꤢ꤬ ꤢꤩ꤬ꤥ꤭ꤕꤛꤢꤪ꤬ ꤗꤛꤢꤗꤛꤢ ꤖꤢꤨꤔꤛꤣ꤬꤯
ꤕꤢ꤬ꤡꤟꤢꤧ ꤘꤢꤨ꤬ꤓꤛꤢ꤬ꤞꤢꤧ꤭ ꤔꤢꤪ꤭ꤢꤩ꤬ ꤔꤢꤪꤊꤟꤌꤣ꤭ ꤒꤟꤢꤧ꤬ꤋꤢꤨ꤬ꤛꤢꤩ꤭ ꤒꤣ꤬ꤕꤚꤟꤢꤧ꤬ ꤟꤢꤩꤏꤥ꤬ꤕꤟꤢꤩ ꤔꤢ “ ꤢ꤬ꤚꤟꤢꤩꤋꤢꤧ꤭ ꤠꤢ꤭ꤥ꤭ꤔꤢꤪ ꤠꤢ, ꤕꤚꤟꤢꤧ꤬ꤋꤢꤨ꤭ ꤟꤢꤩꤚꤢꤪ ꤔꤢꤪ꤭ꤢꤩ꤬ꤗꤛꤢ ꤊꤟꤌꤣ꤭ ꤗꤢ꤬ꤔꤢ ꤢ꤬ꤡ꤉ꤢꤧꤔꤢ ꤒꤥ꤬ꤠꤢ, ꤞꤢꤧꤑꤢꤩ꤭ ꤔꤢ ꤢ꤬ꤚꤛꤢꤒꤥ꤬ ꤗꤢ꤬ꤔꤢ ꤔꤢꤪ꤭ꤢꤩ꤬ꤗꤛꤢꤗꤛꤢꤟꤢꤪ ꤔꤛꤣ꤬" ꤢ꤬ꤟꤢꤩꤘꤢꤦ꤬꤯
ꤘꤣ ꤢ꤬ꤚꤟꤢꤩ ꤂꤀꤀꤈ ꤔꤢ꤬ꤔꤛꤣ꤬ ꤙꤤ ꤞꤤꤚꤤꤘꤢꤪ꤭, ꤘꤤ꤭ꤗꤟꤢꤪꤏꤥ꤬ ꤔꤢ ꤖꤚꤢꤨ꤬ꤏꤥ꤬ ꤠꤟꤤ꤭ꤗꤣ꤭ꤊꤢꤨ꤭ ꤕꤚꤟꤢꤧ꤬ꤏꤢꤪꤖꤤ꤭ ꤥ꤬ꤢꤧꤓꤛꤢ꤬ ꤓꤛꤣ꤭ ꤕꤚꤟꤢꤧ꤬ꤡꤛꤣꤤ꤬ꤏꤢꤧ꤭ꤒꤟꤢ꤭ ꤖꤤ꤭ꤛꤢꤩ꤭ ꤢ꤬ꤥ꤬ꤥ꤬, ꤙꤤ ꤢ꤬ꤔꤢ꤬ ꤂꤀꤀꤉ꤔꤢ꤬ ꤔꤛꤣ꤬ ꤖꤤ꤭ꤛꤢꤩ꤭ ꤢ꤬ꤗꤟꤢꤩ꤬ꤔꤢ ꤛꤢ꤬ꤙꤢꤒꤟꤢꤧ꤬ꤋꤢꤨ꤬(ꤒꤟꤢꤧ꤬ꤋꤢꤨ꤬ ꤒꤢ꤬ꤞꤎꤤ) ꤓꤛꤣ꤭ ꤢ꤬ꤗꤟꤢꤩ꤬ ꤓ꤉ꤟꤥ꤭ꤒꤟꤛꤣꤕꤟꤥꤟꤢꤪꤔꤢ ꤤ꤬ꤞꤢꤧ꤬ꤏꤢꤦ꤭ꤕꤜꤢꤪ꤬ ꤖꤢꤨꤔꤛꤣ꤬ ꤚꤢꤪ ꤤ꤬ꤏꤢꤧ꤭ꤒꤟꤢ꤭ ꤘꤢꤦ꤬ꤔꤢ ꤞꤛꤥꤜꤤ꤬ꤟꤥ꤭ꤖꤢꤨꤛꤢꤩ꤭ꤔꤛꤣ꤬꤯
