ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤞꤤꤚꤤꤘꤢꤪ꤭ꤠꤟꤤ꤭ꤗꤣ꤭ꤊꤢꤨ꤭ ꤘꤣ ꤒꤤ꤭ꤜꤥ꤬ꤘꤢꤪ꤭ꤕꤜꤢꤪꤡꤢꤦ꤭ ꤙꤤ ꤒꤢ꤬꤉ꤢꤘꤢꤪ꤭ ꤔꤛꤣ꤬ ꤗꤟꤢꤘꤣ ꤓꤛꤢꤩ꤭ꤘꤢꤨ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤜꤟꤢꤩꤘꤛꤢꤢꤩ꤬ ꤘꤛꤢꤥ꤭ꤓꤛꤢꤩ꤭ꤛꤢꤩ꤭ ꤢ꤬ꤗ꤉ꤟꤥ꤭ꤕꤜꤤ꤭ꤒꤥ꤬ ꤚꤢꤪ ꤘꤢꤪ꤭ꤊꤢꤨ꤭ꤖꤢꤨ ꤢ꤬ꤕꤚꤟꤢꤧ꤬ ꤃꤀ ꤋꤛꤢꤙꤢꤧ꤬ ꤒꤟꤢꤧ꤬ꤏ꤉ꤤ ꤏꤢꤧ꤭ꤟꤢꤪꤜꤟꤥ꤬ ꤚꤢꤪ ꤢꤧꤒꤢ꤬ꤊꤤ꤭ ꤗꤢ꤬ ꤕꤢ꤬ꤡꤟꤢꤧꤖꤢꤨ ꤟꤢꤩꤘꤢꤦ꤬꤯
ꤘꤣ ꤢꤪ꤬ꤒꤥ꤬ꤙꤢ꤬ꤜꤢꤧ꤭, ꤔꤛꤢꤩ꤭ꤊꤜꤢꤧꤢ꤬ꤊꤢꤨ꤭ ꤊꤟꤢꤩꤡꤟꤢꤦ꤬ ꤒꤢ꤬ꤘꤢꤦ꤬ꤓꤛꤣ꤭ ꤓꤛꤢꤩ꤭ꤘꤢꤨ꤬ꤓꤛꤢ꤬ ꤚꤢꤪ ꤒꤢ꤬꤉ꤢꤘꤢꤪ꤭ ꤔꤛꤣ꤬ ꤙꤢꤧ꤬ꤘꤛꤢꤢꤩ꤬ꤥ꤭ꤕꤚꤢꤧ ꤓꤛꤢꤩ꤭ ꤘꤣ ꤓꤛꤢꤩ꤭ꤢꤪ꤬ꤊꤢꤨ꤭ ꤔꤛꤣ꤬ꤚꤢꤪ ꤕꤢ꤬ꤡꤟꤢꤧ ꤢ꤬ꤔꤢ꤬ ꤁꤀ ꤢ꤬ꤜꤟꤢꤧ꤭ ꤢ꤬ꤕꤚꤟꤢꤧ꤬ ꤂꤀ꤜꤣ ꤔꤢ ꤊꤢ꤬ꤛꤢ꤭ꤘꤢꤨ꤬ ꤢ꤬ꤕꤚꤟꤢꤧ꤬ ꤁꤀ꤜꤣ ꤋꤛꤢꤙꤢꤧ꤬ ꤒꤟꤢꤧ꤬ꤏ꤉ꤤꤏꤢꤧ꤭ꤟꤢꤪꤜꤟꤥ꤬ ꤛꤢꤩ꤭ ꤔꤛꤣ꤬꤯
“ ꤘꤣꤕꤟꤢꤧ꤬ꤘꤢꤪ꤭ ꤛꤢꤩ꤭ ꤕꤟꤢꤧ꤬ꤔꤢꤪ꤭ ꤢꤩ꤬ ꤕꤚꤢꤧ ꤓꤛꤢꤩ꤭ꤢꤪ꤬, ꤓꤛꤢꤩ꤭ꤛꤢꤩ꤭ ꤢ꤬ꤥ꤬ꤘꤣ ꤢ꤬ꤋꤢꤨ꤬ ꤒꤟꤢ꤭ꤊꤢ꤬ꤔꤟꤌꤣ꤭ ꤖꤢꤨꤔꤛꤣ꤬ꤚꤢꤪ ꤢ꤬ꤊꤢ꤬ꤘꤛꤣ ꤔꤛꤢ꤬ꤡꤢꤪ, ꤊꤢ꤬ꤛꤢ꤭ ꤔꤢ ꤕꤟꤢꤨꤕꤢ꤬ꤔꤟꤢꤧ ꤢꤩ꤬ꤥ꤬ ꤤ꤬ꤜꤟꤌꤣ ꤒꤟꤌꤣꤜꤟꤢꤪ꤭ꤜꤢꤨ꤭ ꤕꤚꤢꤧꤚꤢꤪ ꤒꤟꤢꤧ꤬ꤏ꤉ꤤꤒꤟꤢꤧ꤬ꤏꤢꤧ꤭ꤙꤢꤧ꤬ꤟꤢꤪ ꤔꤛꤣ꤬" ꤔꤛꤣ꤬ꤗꤢ꤬ ꤒꤢ꤬꤉ꤢꤘꤢꤪ꤭ ꤊꤢꤨ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩꤕꤟꤢꤩꤘꤢꤦ꤬ ꤖꤢꤨꤔꤛꤣ꤬꤯
ꤕꤚꤟꤢꤧ꤬ꤋꤛꤢꤙꤢꤧ꤬ ꤒꤟꤢꤧ꤬ꤏ꤉ꤤꤛꤢꤩ꤭ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤐꤟꤢꤦ ꤥ꤬ꤜꤢ꤭ ꤙꤢꤛꤢꤩ꤭ꤙꤢꤔꤛꤣ꤬ ꤒꤥ꤬ ꤗꤢ꤬ꤔꤢ ꤕꤚꤟꤢꤧ꤬ꤋꤛꤢꤙꤢꤧ꤬ ꤒꤢ꤬ꤟꤢꤩ꤬ ꤏꤢꤧ꤭ꤟꤢꤪꤓꤛꤢꤩ꤭ ꤡꤤ꤬ꤡꤢꤦ꤭, ꤗꤢꤧ꤬ꤞꤢꤧ꤬ꤕꤜꤢꤪ꤬ꤊꤢꤨ꤭ ꤊꤢ꤬ꤢꤪ꤬ꤜꤟꤢꤪ꤭, ꤋꤢ꤭ꤢꤨ꤬ꤖꤢꤊꤚꤢ꤭ ꤜꤟꤢꤪ꤭ꤔꤛꤣ꤬ ꤗꤛꤢꤓꤛꤢꤩ꤬ꤙꤢꤧ꤬ ꤖꤢꤨꤔꤛꤣ꤬꤯
ꤕꤚꤟꤢꤧ꤬ꤡꤛꤣꤊꤢꤨꤐꤟꤢ꤬ꤒꤟꤢꤧ꤬ ꤒꤟꤢꤧ꤬ꤋꤢꤨ꤬ ꤞꤢꤚꤢ ꤜꤢ꤭ꤋꤛꤢꤩ꤭ ꤟꤢꤩꤔꤢ ꤘꤢꤪ꤭ꤖꤢꤨꤏꤥ꤬ꤖꤢꤨ ꤕꤚꤟꤢꤧ꤬ꤋꤛꤢꤙꤢꤧ꤬ ꤒꤢ꤬ꤟꤢꤩ꤬ ꤢ꤬ꤑꤢꤩ꤭ ꤕꤟꤢꤧ꤬ꤡꤛꤣꤘꤛꤢꤩ ꤞꤢꤧꤑꤢꤩ꤭ ꤢꤧ꤬ꤞꤤ꤭ ꤒꤟꤢꤧ꤬ꤥ꤬ꤞꤢ꤭ꤚꤛꤢ꤭ ꤒꤟꤢꤧ꤬ꤒꤢ꤬ꤊꤢꤪ꤭ꤒꤢ꤬ꤊꤟꤢꤧ꤬ ꤢ꤬ꤚꤢꤩ꤬, ꤡꤛꤣꤊꤢꤨꤐꤟꤢ꤬ ꤕꤟꤢꤩꤢꤧ꤬ꤞꤤ꤭ ꤖꤢꤨꤔꤛꤣ꤬꤯
“ ꤢ꤬ꤓ꤉ꤟꤥ꤭ ꤓꤛꤢ꤬ ꤒꤣ꤬ꤔꤛꤢꤩ꤭ ꤔꤛꤢꤩ꤭ꤔꤛꤢꤩ꤭ ꤢ꤬ꤊꤢꤨ꤭ ꤒꤟꤢꤧ꤬ꤋꤢꤨ꤬ ꤞꤢꤚꤢ ꤒꤢ꤬ꤊꤜꤢꤪ ꤡꤛꤣꤒꤟꤌꤣ ꤊꤢꤨꤐꤟꤢ꤬ ꤜꤢꤧꤔꤟꤤ ꤚꤢꤪ ꤕꤚꤟꤢꤧ꤬ꤞꤛꤢꤩ꤭ ꤕꤚꤟꤢꤧ꤬ꤗꤟꤢꤩ ꤥ꤬ꤜꤢ꤭ꤟꤤ ꤒꤥ꤬, ꤘꤣ ꤘꤢꤪ꤭ꤚꤟꤛꤣ꤬ ꤔꤛꤣ꤬ꤗꤢ꤬ ꤒꤟꤢꤧ꤬ꤏ꤉ꤤ ꤏꤢꤧ꤭ꤟꤢꤪꤜꤟꤥ꤬ ꤢ꤬ꤓ꤉ꤟꤥ꤭ ꤒꤣ꤬ꤕꤚꤟꤢꤧ꤬ ꤔꤛꤢꤩ꤭ꤕꤚꤟꤢꤧ꤬ ꤖꤢꤨꤔꤛꤣ꤬ " ꤔꤛꤣ꤬ꤗꤢ꤬ ꤒꤟꤢꤧ꤬ꤥ꤬ꤏ꤉ꤟꤥ꤬ ꤥ꤬ꤕꤚꤟꤛꤢ꤭ ꤗꤢꤙꤥ꤭ ꤕꤚꤟꤢꤧ꤬ꤋꤛꤢꤋꤢꤨ꤬ ꤥ꤬ ꤋꤢꤨ꤬ꤘꤢꤧ꤬ꤔꤛꤢ꤬ ꤟꤢꤩꤏꤥ꤬ꤘꤢꤦ꤬꤯
ꤒꤢ꤬꤉ꤢꤘꤢꤪ꤭ ꤛꤢꤩ꤭ ꤟꤤ꤬ꤋꤢꤨ꤬ ꤥ꤬ ꤄꤀ ꤗꤢꤩ꤭ ꤓꤛꤣ꤭ ꤕꤚꤟꤢꤧ꤬ꤔꤟꤢꤩꤥ꤬ ꤢ꤬ꤕꤚꤟꤢꤧ꤬ ꤁꤀꤀ ꤜꤣ ꤚꤢꤪ ꤘꤢꤪ꤭ꤛꤢꤩ꤭ ꤢ꤬ꤥ꤬ꤐꤛꤢꤩ꤬ꤜꤢ꤭ ꤔꤢ ꤠꤟꤤ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤜꤟꤢꤩꤡꤛꤣꤜꤟꤢꤩꤊꤟꤢ꤬ ꤢ꤬ꤕꤟꤛꤢꤢ꤬ꤏꤢꤧ꤭ ꤜꤢ꤭ ꤖꤢꤨꤔꤛꤣ꤬꤯
