ꤊꤟꤢꤩꤡꤟꤢꤦ꤬ꤒꤢ꤬ꤘꤢꤦ꤬ ꤚꤢꤪ ꤙꤤ꤬ꤜꤢꤨ꤭ꤡꤏꤢꤪ꤭ ꤓꤛꤢꤩ꤭ꤜꤟꤛꤢ꤭ꤗꤟꤌꤣꤛꤢꤩ꤭ ꤢ꤬ꤘꤢꤨ꤭ꤓꤛꤢ꤬ ꤊꤟꤌꤣ꤭ꤊꤟꤌꤣ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤕꤚꤟꤢꤧ꤬ꤥ꤬ꤖꤢꤦ꤬ ꤔꤢ ꤓꤛꤢꤩ꤭ꤜꤟꤛꤢ꤭ꤗꤟꤌꤣꤛꤢꤩ꤭ ꤢ꤬ꤙꤢꤧ꤬ꤕꤟꤛꤢꤙꤢꤧ꤬ꤏꤢꤧ꤭ ꤜꤟꤢꤪ꤭ꤘꤢꤦ꤬꤯ ꤓꤛꤣ꤭ꤒꤥ꤬ ꤢꤩ꤭ꤜꤢꤩ꤭ꤓꤛꤢꤩ꤭ꤢꤪ꤬ ꤛꤢꤩ꤭ ꤗꤥꤙꤛꤢꤧꤓꤛꤢꤩ꤭ꤋꤢꤪ꤬ꤙꤢꤩ꤭ ꤢ꤬ꤙꤢ꤭ ꤒꤟꤢ꤭ꤕꤟꤢꤧ꤭ꤊꤛꤢ꤭ꤚꤢꤪ ꤕꤜ꤉ꤥ꤭ꤒꤟꤢ꤭ꤊꤛꤢ꤭ ꤓꤛꤢꤩ꤭ꤛꤢꤩ꤭ꤔꤛꤣ꤬, ꤓꤛꤢꤩ꤭ꤛꤢꤩ꤭ꤔꤛꤣ꤬ ꤢ꤬ꤒꤟꤢ꤭ ꤊꤢ꤬ꤜꤟꤛꤢ꤭ꤜꤟꤢꤪ꤭ꤕꤚꤢꤧ ꤔꤢ ꤙꤤ꤬ꤜꤢꤨ꤭ꤡꤏꤢꤪꤛꤢꤩ꤭ ꤔꤛꤣ꤬ꤚꤢꤪ ꤟꤤ꤬ ꤥ꤬ꤙꤤ ꤔꤛꤣ꤬ꤒꤢ꤬ꤊꤜꤢꤪ ꤗꤢ꤬ ꤢ꤬ꤓꤛꤢ꤬ꤕꤜꤢꤦ꤬ ꤊꤢ꤬ꤛꤢ꤭ꤒꤢ꤬ꤕꤚꤟꤢꤧ꤬ꤊꤢ꤬ꤓꤢꤪ꤬ ꤖꤢꤨꤔꤛꤣ꤬꤯ꤘꤤ꤭ꤗꤢꤪꤏꤥ꤬ ꤠꤟꤤ꤭ꤗꤣ꤭ꤊꤢꤨ꤭ ꤔꤢꤗꤢꤧ꤬ꤋꤥ꤬ ꤘꤢꤪ꤭ꤕꤜꤢꤪꤡꤢꤦ꤭ ꤖꤢ꤬ꤛꤢ꤭ꤖꤛꤢꤨ꤬, ꤖꤢ꤬ꤛꤢ꤭ꤔꤤ꤬ ꤔꤢ ꤖꤢꤪ꤭ꤒꤢꤪ꤭ꤘꤢꤪ꤭ꤒꤢ꤬ꤟꤢꤩ꤬ ꤚꤢꤪ ꤓꤛꤢ꤬ꤙꤢꤧꤕꤢ꤭ꤞꤛꤥꤜꤤ꤬ꤟꤥ꤭ꤒꤥ꤬꤯
ꤕꤚꤟꤢꤧ꤬ꤥ꤬ꤖꤢꤦ꤬ ꤔꤢ ꤞꤢꤚꤢꤞꤢꤚꤢꤗꤟꤌꤣꤒꤢ꤬ꤕꤚꤟꤢꤧ꤬ ꤟꤢꤩ ꤔꤢ “ ꤓꤛꤢꤩ꤭ꤓꤛꤢ꤬ꤔꤢꤓꤛꤢ꤬ ꤚꤢꤪ ꤡꤛꤣꤡꤟꤛꤢꤕꤢ꤭ ꤘꤣ ꤞꤛꤥꤜꤤ꤬ꤟꤥ꤭ꤒꤥ꤬꤯ ꤓꤛꤢꤩ꤭ꤓꤛꤢ꤬ ꤒꤟꤌꤣꤜꤟꤢꤪ꤭ꤘꤣ ꤞꤛꤥꤜꤤ꤬ꤟꤥ꤭ꤊꤢꤨ꤭, ꤚꤢꤪ ꤙꤢꤧ꤬ꤢ꤬ꤊꤟꤌꤣꤊꤛꤢ꤭ ꤞꤛꤥꤜꤤ꤬ꤟꤥ꤭ ꤖꤢꤨꤔꤛꤣ꤬" ꤢ꤬ꤟꤢꤩꤘꤢꤦ꤬꤯
ꤓꤛꤢꤩ꤭ꤓꤛꤢ꤬ꤙꤢ꤭ ꤜꤟꤢꤪ꤭ ꤘꤣ ꤊꤜꤛꤢꤊꤢꤨ꤭ ꤘꤣ ꤞꤛꤥꤜꤤ꤬ꤟꤥ꤭ ꤊꤢꤨ꤭ ꤚꤢꤪ ꤕꤢ꤬ꤡꤟꤢꤧ ꤜꤟꤢꤩꤡꤛꤣ ꤊꤟꤢ꤬ꤢ꤬ꤑꤢꤩ꤭ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤐꤟꤢꤦ ꤥ꤬꤯ ꤗꤟꤌꤣꤖꤢꤧ꤭ꤒꤢ꤬ꤊꤜꤢꤪꤗꤢ꤬ ꤢ꤬ꤒꤟꤢꤧ꤬ꤙꤢꤩ꤬ꤐꤟꤢꤪ꤬ ꤥ꤬ꤢꤧ꤯
ꤕꤢ꤬ꤡꤟꤢꤧ ꤗꤟꤌꤣꤖꤢꤧ꤭ꤒꤣ꤬ꤕꤚꤟꤢꤧ꤬ ꤟꤢꤩꤔꤢ “ ꤓꤛꤢꤩ꤭ꤊꤜꤥ꤭ ꤓꤛꤢꤩ꤭ꤓ꤉ꤤꤟꤛꤢ꤭ꤚꤢꤪ ꤕꤢ꤬ꤡꤟꤢꤧꤒꤢ꤬ꤊꤜꤢꤪ ꤢ꤬ꤑꤢꤩ꤭ ꤢ꤬ꤐꤟꤢꤨ꤭ ꤔꤢ ꤒꤥ꤬꤯ ꤙꤢꤧ꤬ꤚꤟꤢꤪ꤬ꤚꤛꤢꤩ꤭ꤔꤟꤤ, ꤔꤢꤪ꤭ꤡꤛꤣꤐꤛꤢꤩ꤬ꤔꤢ ꤒꤥ꤬" ꤢ꤬ꤟꤢꤩꤘꤢꤦ꤬꤯
ꤔꤢꤗꤢꤧ꤬ꤋꤥ꤬ ꤘꤢꤪ꤭ꤕꤜꤢꤪꤡꤢꤦ꤭ ꤘꤢꤪ꤭ꤒꤢ꤬ꤟꤢꤩ꤬ ꤘꤣ ꤢꤧ꤬ꤞꤤ꤭ꤜꤟꤛꤢꤔꤛꤣ꤬ ꤓꤛꤢꤩ꤭ꤓꤛꤢ꤬ ꤒꤟꤌꤣꤡꤢꤪ ꤊꤢ꤬ꤛꤢ꤭ ꤒꤢ꤬ꤊꤜꤢ꤭ꤗꤢꤩ꤭ꤚꤢꤪ ꤔꤟꤌꤣ꤭ꤊꤢꤧꤕꤟꤛꤢꤏꤢꤧ꤭ꤜꤢ꤭ ꤘꤣ ꤓꤛꤢꤩ꤭ꤊꤜꤢꤧ꤭ ꤖꤢꤨꤔꤛꤣ꤬꤯
ꤗꤛꤢꤓꤛꤢꤩ꤬ ꤙꤢꤧ꤬ ꤓꤛꤢꤩ꤭ꤒꤟꤢꤪ꤬ꤜꤟꤢꤪ꤭ ꤜꤟꤛꤢꤋꤢꤨ꤬ ꤖꤢꤨꤔꤛꤣ꤬ ꤚꤢꤪ ꤙꤟꤌꤣꤞꤢꤧ꤬ꤒꤢ꤬ꤟꤢꤩ꤬ ꤘꤛꤢꤕꤜꤢꤨꤓꤛꤢ꤬ ꤏꤢꤜꤟꤢꤩꤕꤢ꤭ꤒꤢ꤬ꤟꤢꤩ꤬꤯ ꤊꤟꤢꤩꤡꤟꤢꤦ꤬ꤋꤢꤧ꤭ ꤙꤟꤌꤣ ꤒꤟꤢ꤭ꤜꤟꤢꤪ꤭ ꤘꤣ ꤓꤛꤢꤩ꤭ꤊꤢꤨ꤭, ꤊꤟꤢꤩꤊꤟꤢꤨꤋꤢꤧ꤭ ꤙꤟꤌꤣꤒꤢ꤬ꤟꤢꤩ꤬ ꤊꤢꤧꤐꤟꤢꤑꤢ꤬ꤡꤢꤪ ꤘꤣꤓꤛꤢꤩ꤭ꤊꤜꤢꤧ꤭ ꤓꤛꤣ꤭ ꤋꤢ꤬ꤜꤟꤢꤩꤒꤢ꤬ꤟꤢꤩ꤬ ꤢ꤬ꤕꤛꤢꤩꤊꤛꤢ꤭ꤜꤟꤢꤪ꤭ꤘꤢꤦ꤬꤯ ꤓꤛꤢꤩ꤭ꤓꤛꤢ꤬ꤜꤟꤢꤪ꤭ ꤘꤣ ꤟꤤ꤬ꤊꤢꤨ꤭ ꤖꤢꤨꤔꤛꤣ꤬ꤚꤢꤪ ꤥ꤬ꤡꤟꤛꤢꤕꤢ꤭ ꤔꤢ ꤒꤥ꤬꤯
“ ꤡꤛꤣ ꤥ꤬ꤜꤢ꤬ꤟꤛꤢ꤭ ꤘꤣ ꤡꤢꤪꤙ꤉ꤤꤟꤥ꤭, ꤗꤢ꤬ꤔꤢ ꤘꤣ ꤡꤢꤪꤙ꤉ꤤꤟꤥ꤭ ꤔꤛꤣ꤬ ꤢꤧꤥ꤬ꤙꤢꤧꤕꤚꤢꤧ ꤅ꤟꤤꤕꤚꤢꤧꤕꤚꤢꤧ, ꤢ꤬ꤥ꤬ꤔꤟꤤ ꤢꤧ ꤔꤢ ꤊꤢ꤬ꤛꤢ꤭ꤒꤥ꤬" ꤕꤚꤟꤢꤧ꤬ꤋꤛꤢꤙꤢꤧ꤬ꤒꤣ꤬ꤕꤚꤟꤢꤧ꤬ ꤟꤢꤩꤕꤟꤢꤩꤘꤢꤦ꤬ꤖꤢꤨꤔꤛꤣ꤬꤯
ꤖꤢ꤬ꤛꤢ꤭ꤖꤛꤢꤨ꤬ ꤕꤚꤟꤢꤧ꤬ꤙꤟꤌꤣ꤬ꤒꤟꤢꤧ꤭ꤒꤢ꤬ꤟꤢꤩ꤬ ꤒꤟꤢꤧ꤬ꤢꤪ꤬ꤕꤜꤢꤦ꤬ꤜꤟꤢꤪ꤭ ꤔꤢ ꤓꤛꤢꤩ꤭, ꤒꤟꤢꤧ꤬ꤜꤢ꤬ꤡꤟꤢꤨ ꤜꤢ꤬ꤕꤚꤟꤢꤪ꤬ ꤥ꤬ꤖꤢꤨꤛꤢꤩ꤭ ꤔꤛꤣ꤬ꤚꤢꤪ ꤕꤚꤟꤢꤧ꤬ꤙꤟꤌꤣ꤬ꤒꤟꤢꤧ꤭ ꤒꤢ꤬ꤕꤚꤟꤢꤧ꤬ ꤘꤛꤢ꤬ꤡꤟꤛꤢ ꤊꤟꤌꤣ꤭ ꤢꤧ꤬ꤞꤢꤧꤕꤜꤢꤪ꤬ꤒꤥ꤬ꤚꤢꤪ ꤞꤎ꤉ꤤ꤬ꤓꤛꤢ꤬ꤞꤛꤢꤩ꤭ꤊꤛꤢ꤭ꤘꤢꤦ꤬ ꤔꤛꤣ꤬ ꤗꤢ꤬ ꤕꤚꤟꤢꤧ꤬ꤥ꤬ꤙꤤꤔꤛꤣ꤬ ꤒꤣ꤬ꤕꤚꤟꤢꤧ꤬ꤟꤢꤩꤕꤟꤢꤩꤘꤢꤦ꤬꤯
“ ꤢ꤬ꤙꤟꤌꤣ꤬ꤚꤟꤥꤙꤟꤌꤣꤢꤧ ꤋꤢ꤭ꤜꤟꤢꤩ ꤢꤩ꤬ꤊꤢꤘꤣ ꤢ꤬ꤚꤤꤊꤢꤨ꤭ ꤒꤢ꤬ꤟꤢꤩ꤬ ꤜꤢ꤬ꤡꤟꤢꤨꤡꤢꤪꤘꤣ ꤢ꤬ꤞꤎꤤ꤭ꤊꤢꤨ꤭ ꤡꤢꤪ, ꤒꤟꤢꤧ꤬ꤓꤢꤩ꤬ꤒꤟꤢ꤭ꤒꤟꤌꤣꤜꤟꤢꤪ꤭ ꤘꤣ ꤙꤤ꤬ꤜꤢꤨ꤭ꤡꤏꤢꤪ ꤖꤢꤨꤔꤛꤣ꤬" ꤢ꤬ꤟꤢꤩꤘꤢꤦ꤬꤯
ꤒꤟꤢꤧ꤭ ꤥ꤬ꤕꤢ꤭ ꤒꤢ꤬ꤟꤢꤩ꤬ꤔꤛꤣ꤬ꤗꤢ꤬ ꤕꤚꤟꤢꤧ꤬ꤡꤛꤣꤠꤟꤤ꤭ꤢꤩ꤬ ꤔꤢ ꤒꤢ꤬ꤠꤟꤤ꤭ ꤗꤢ꤬ ꤢ꤬ꤥ꤬ꤘꤢꤦ꤬ꤘꤢꤦ꤬꤯ꤖꤢ꤬ꤛꤢ꤭ꤖꤛꤢꤨ꤬, ꤖꤢ꤬ꤛꤢ꤭ꤔꤤ꤬ ꤔꤢ ꤖꤢꤪ꤭ꤒꤢꤪ꤭ꤘꤢꤪ꤭ꤒꤢ꤬ꤟꤢꤩ꤬ ꤢ꤬ꤋꤢ꤭ꤜꤟꤢꤩꤔꤛꤣ꤬ ꤍ꤉ꤢꤩ꤬ꤘꤢꤪ꤬ꤓꤛꤢꤩ꤭ꤊꤜꤥ꤭, ꤔꤢꤖꤢꤧ꤬ꤋꤥ꤬ꤓꤛꤢꤩ꤭ꤊꤜꤥ꤭ ꤒꤟꤢ꤭ꤏꤢꤦ꤬ꤜꤢꤨ꤭ ꤓꤛꤣ꤭ ꤋꤢ꤭ꤜꤟꤢꤩꤙꤤ ꤔꤛꤣ꤬ ꤢ꤬ꤞꤛꤢꤊꤛꤢ꤭ ꤔꤢ ꤒꤟꤢꤪ꤬ꤊꤢꤨ꤭ ꤖꤢꤨꤔꤛꤣ꤬꤯ꤘꤣ ꤞꤤꤚꤤꤘꤢꤪ꤭ ꤙꤤ ꤔꤢꤊꤢꤨꤘꤢꤪ꤭ꤊꤛꤢꤩ꤭ ꤔꤢ ꤙꤤ꤬ꤜꤢꤨ꤭ꤡꤏꤢꤪ꤭ ꤓꤢꤦ꤭ ꤟꤤ꤬ꤒꤢ꤬ꤟꤢꤩ꤬ ꤡꤛꤣꤥ꤬ꤒꤢ꤬ꤖꤢ꤭ꤜꤟꤢꤪ꤭ꤘꤢꤦ꤬꤯
“ ꤊꤢ꤬ꤛꤢ꤭ꤥ꤬ꤘꤣ ꤙꤤ ꤡꤢ꤬ꤕꤢ꤬ ꤋꤥ ꤢ꤬ꤜꤟꤢꤧ꤭ ꤡꤤꤜꤟꤛꤢ꤬ꤒꤢ꤬ꤊꤛꤢꤩ꤭ ꤓꤛꤢꤩ꤭ꤓꤛꤢ꤬ ꤜꤟꤢꤪ꤭ꤟꤤ꤬ꤒꤢ꤬ꤊꤜꤢ꤭ꤗꤢꤩ꤭ ꤚꤢꤪ ꤥ꤬ꤡꤟꤛꤢꤕꤢ꤭ ꤔꤢ ꤒꤥ꤬" ꤔꤛꤣ꤬ꤗꤢ꤬ ꤞꤤꤚꤤꤘꤢꤪ꤭ꤕꤚꤟꤢꤧ꤬ꤗꤢꤪ꤬ꤖꤢꤨ ꤒꤢ꤬ꤕꤚꤟꤢꤧ꤬ꤟꤢꤩꤕꤟꤢꤩꤘꤢꤦ꤬꤯ ꤓꤛꤣ꤬ ꤗꤛꤢꤓꤛꤢꤩ꤬ ꤔꤢꤕ ꤚꤟꤢꤧ꤬ꤜꤟꤢꤦ꤬ ꤗꤟꤢꤩ꤬ꤡ꤉ꤟꤥ ꤘꤛꤢꤩꤡ꤉ꤟꤥ ꤥ꤬ꤜꤢ꤭ꤟꤤꤒꤥ꤬꤯
