ꤕꤟꤥ꤬ꤓꤢꤩ꤬ ꤔꤟꤤꤊꤟꤌꤣ꤭ꤘꤢꤦ꤬ꤟꤢꤪ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤜꤤ꤬ꤕꤜꤢꤪ꤬ꤗꤟꤌꤣ ꤛꤢꤩ꤭ ꤙꤢꤧ꤬ꤚꤤ꤬ ꤗꤟꤛꤢ꤬ꤜꤟꤢꤪ꤬ ꤓꤛꤢꤩ꤭ꤊꤟꤢꤩꤋ꤉ꤤ ꤋꤢꤨ꤬ ꤓꤛꤢ꤬ꤞꤢꤧ꤭ ꤋꤥ꤭ꤑꤟꤢꤛꤢꤩ꤭ꤔꤛꤣ꤬ ꤢ꤬ꤡꤟꤢꤨ꤭ꤢꤩ꤬ ꤊꤟꤌꤣ꤭ꤔꤢ ꤒꤥ꤬꤯ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤕꤟꤥ꤬ꤓꤢꤩ꤬ ꤜꤤ꤬ꤕꤜꤢꤪ꤬ꤗꤟꤌꤣ ꤙꤤ ꤢ꤬ꤔꤢ꤬ ꤁꤉꤅꤈ ꤔꤢ꤬ ꤔꤛꤣ꤬ ꤚꤢꤪ ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤗ-ꤏ-ꤜ, ꤔ-꤉-ꤒ, ꤔ-ꤢ-ꤖ ꤊꤢ꤬ꤘꤢ꤭ꤊꤢꤨ꤭ ꤗꤟꤢꤩ꤬ꤒꤟꤢ꤭ꤒꤟꤢꤦ꤭ (ꤘꤛꤢꤩꤔꤢꤪ꤭ꤢꤩ꤬ꤒꤥ꤬) ꤒꤟꤛꤣ ꤋꤥ꤭ꤑꤟꤢ꤯
ꤘꤣꤢ꤬ꤚꤟꤢꤩꤋꤢꤧ꤭ ꤡꤛꤣꤟꤢꤩꤞꤛꤥꤒꤟꤢ꤭ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤢ꤬ꤗꤟꤢ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤕꤟꤥ꤬ꤓꤢꤩ꤬ꤜꤤ꤬ꤕꤜꤢꤪ꤬ ꤘꤣ ꤞꤛꤥꤜꤤ꤬ꤟꤥ꤭ ꤞꤤ꤭ ꤚꤢꤪ ꤞꤢꤚꤢ, ꤞꤢꤚꤢꤗꤟꤌꤣ ꤒꤢ꤬ꤟꤢꤩ꤬ꤛꤢꤩ꤭ ꤋꤛꤢꤙꤢꤧ꤬ ꤔꤢ ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ ꤒꤟꤢꤧ꤬ꤕꤟꤢꤦ ꤒꤟꤢꤧ꤬ꤡꤢꤪ꤭ ꤒꤢ꤬ꤟꤢꤩ꤬꤯
ꤕꤚꤟꤢꤧ꤬ꤘꤣ ꤢ꤬ꤗꤟꤥ꤬ꤔꤟꤤ ꤊꤢ꤬ꤛꤢ꤭ꤜꤟꤤ꤬ ꤗꤛꤢꤩ꤭ꤡꤣ꤬ꤞꤤ꤭ ꤒꤢ꤬ꤟꤢꤩ꤬ ꤗꤢ꤬ ꤘꤣ ꤒꤟꤢꤧ꤬ꤒꤢ꤬ꤚꤢꤪ꤬ꤞꤢꤧ ꤢ꤬ꤊꤢꤨ꤭ ꤢꤛꤢꤡꤢꤦ ꤔꤢꤪ꤭ꤢꤩ꤬ꤔꤟꤤꤖꤢꤨ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ꤛꤢꤩ꤭ ꤊꤟꤢꤦꤜꤟꤛꤣ꤭ꤓꤢꤩ꤬ꤏꤢꤪ꤭ ꤢ꤬ꤑꤢꤩ꤭ ꤒꤢ꤬ꤘꤣ꤬ꤚꤢꤪ ꤋꤛꤢꤙꤢꤧ꤬ ꤒꤢ꤬ꤘꤢꤦ꤬ꤕꤢ꤭ ꤗꤟꤛꤢ꤬ꤜꤟꤢꤪ꤭ꤋ꤉ꤤ ꤓꤛꤢ꤬ꤞꤢꤧ꤭ ꤛꤢꤩ꤭ ꤢ꤬ꤟꤢꤩꤕꤚꤢꤧꤔꤢ ꤜꤤ꤬ꤛꤢꤩ꤭ ꤗꤢ꤬ ꤢ꤬ꤗꤟꤢꤕꤚꤢꤧ ꤕꤚꤟꤢꤧ꤬ꤏꤢꤊꤥ꤬ ꤢ꤬ꤕꤜꤢꤪꤢ꤬ꤗꤟꤢꤨ꤬ ꤞꤤ꤭ꤒꤢ꤬ꤟꤢꤩ꤬ ꤢ꤬ꤜꤤ꤬ꤜꤟꤢꤧ꤬ ꤟꤢꤩꤖꤢꤨꤛꤢꤩ꤭ꤔꤛꤣ꤬꤯
ꤒꤟꤢꤧ꤬ ꤒꤢ꤬ꤚꤢꤪ꤬ꤞꤢꤧ ꤢ꤬ꤊꤢꤨ꤭ ꤕꤚꤟꤢꤧ꤬ꤢꤛꤢꤡꤢꤦ ꤗꤟꤢꤩ꤬ꤡ꤉ꤟꤥ ꤘꤣ ꤜꤟꤢꤩꤜꤟꤛꤣ꤭ꤓꤢꤩ꤬ꤏꤢꤪ꤭ ꤘꤛꤢꤩꤟꤢꤪ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤢ꤬ꤑꤢꤩ꤭ꤛꤢꤩ꤭ ꤒꤣ꤬ꤕꤚꤟꤢꤧ꤬ ꤟꤢꤩꤏꤥ꤬ꤕꤟꤢꤩꤘꤢꤦ꤬ꤔꤢ “ꤕꤟꤢꤧ꤬ ꤞꤢꤧꤐꤟꤢꤦꤗꤟꤢꤩ꤬ ꤕꤚꤢꤧꤒꤟꤢꤦ ꤕꤟꤢꤧ꤬ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤕꤟꤥ꤬ꤓꤢꤩ꤬ ꤜꤤ꤬ꤜꤟꤢꤧ꤬ꤛꤢꤩ꤭꤯ ꤗꤢ꤬ꤔꤢ ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤒꤢ꤬ꤟꤢꤩ꤬ ꤟꤢꤩꤔꤢ ꤢ꤬ꤗꤟꤢꤕꤚꤢꤧ ꤊꤜꤛꤢꤩꤍꤢ꤭ ꤜꤤ꤬ꤜꤟꤢꤧ꤬꤯ ꤘꤣ ꤕꤟꤢꤧ꤬ꤥ꤬ ꤜꤤ꤬ꤜꤟꤢꤧ꤬ ꤢ꤬ꤙꤢꤧ꤬ꤊꤛꤢꤔꤢ ꤜꤤ꤬ꤊꤢ꤬ꤛꤢ꤭ ꤛꤢꤩ꤭ ꤕꤟꤢꤧ꤬ꤟꤣ ꤔꤟꤤꤓꤛꤣ꤭ ꤢꤧ꤬ꤗꤢ꤬ ꤙꤢꤧ꤬ꤘꤛꤢ꤬ꤢꤟꤌꤣ ꤘꤛꤢ꤬ꤙꤤꤔꤟꤤꤡꤢꤪ"
ꤋꤥ꤭ꤑꤟꤢ ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩ ꤢ꤬ꤊꤢꤨ꤭ ꤜꤤ꤬ꤜꤟꤢꤧ꤬ ꤜꤟꤢꤩꤚꤢ꤭ꤓꤢꤩ꤬ ꤔꤟꤤꤟꤢꤪ ꤊꤢ꤬ꤛꤢ꤭ꤜꤟꤤ꤬ ꤍꤟꤥꤛꤢꤩ꤭ ꤢ꤬ꤥ꤬ ꤃ ꤊꤟꤌꤣ꤬ ꤢ꤬ꤊꤜꤢꤧ꤭ ꤔꤢꤪ꤭ꤢꤩ꤬ꤔꤟꤤꤕꤚꤢꤧꤒꤢꤦ ꤢ꤬ꤞꤛꤢꤔꤢ ꤗꤟꤛꤢ꤬ꤜꤟꤢꤪ꤬ ꤜꤤ꤬ꤕꤜꤢꤪ꤬ꤛꤢꤩ꤭ ꤒꤣ꤬ꤊꤟꤌꤣ꤬ꤒꤟꤛꤣ꤭꤯
ꤊꤢ꤬ꤛꤢ꤭ꤜꤟꤤ꤬ꤊꤟꤢꤩꤊꤢꤨ꤭ ꤕꤚꤟꤢꤧ꤬ꤗꤟꤢꤩ꤬ꤒꤟꤌꤣꤒꤟꤢꤧ꤬ ꤜꤤ꤬ꤜꤟꤢꤧ꤬ ꤗꤢꤙꤥ꤭ ꤒꤣ꤬ꤕꤚꤟꤢꤧ꤬ ꤟꤢꤩꤕꤟꤢꤩꤘꤢꤦ꤬ ꤔꤢ “ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤟꤢꤩꤘꤢꤦ꤬ꤔꤢ ꤥ꤬ꤗꤟꤛꤢ꤬ꤊꤟꤢꤩ ꤚꤢꤪ ꤒꤥ꤭ꤊꤢꤪ꤬ ꤔꤢꤪ꤭ꤢꤩ꤬ ꤗꤟꤛꤢ꤬ꤜꤤ꤬ꤕꤜꤢꤪ꤬ ꤛꤢꤩ꤭ꤊꤢꤪ꤭꤯ ꤖꤢꤨꤔꤛꤣ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤙꤢꤧ꤬ꤐꤟꤢꤪ꤬ꤕꤚꤢꤧ ꤘꤣ ꤕꤟꤢꤧ꤬ꤜꤢ꤭ꤕꤟꤢꤧ꤬ꤍꤟꤥ, ꤕꤟꤢꤧ꤬ꤜꤤ꤬ꤕꤟꤢꤧ꤬ꤜꤟꤢꤧ꤬ ꤊꤟꤢꤦꤚꤟꤢꤩ ꤜꤢ꤬ꤗꤟꤢꤩꤊꤛꤢ꤭ꤒꤥ꤬ ꤚꤢꤪ ꤕꤟꤢꤧ꤬ꤊꤚ꤉ꤥ꤭ ꤙꤢꤧ꤬ ꤔꤢꤪ꤭ꤢꤩ꤬ꤊꤟꤌꤣ꤭ꤕꤚꤢꤧꤟꤢꤪ ꤢꤧ꤬ꤞꤤ꤭ ꤜꤤ꤬ꤕꤜꤢꤪ꤬ꤛꤢꤩ꤭”
ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤞꤤ꤭ꤒꤢ꤬ꤟꤢꤩ꤬ ꤔꤛꤣ꤬ ꤢ꤬ꤥ꤬ ꤃ ꤡꤣ꤬ ꤢ꤬ꤗꤟꤢ ꤗꤟꤛꤢ꤬ꤜꤤ꤬ꤕꤜꤢꤪ꤬, ꤊꤢꤨ꤭ꤜꤢ꤭ ꤜꤤ꤬ꤕꤜꤢꤪ꤬ (ꤜꤢꤧꤒꤢꤩ꤬ꤜꤤ꤬) ꤔꤢ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤕꤟꤥ꤬ꤓꤢꤩ꤬ꤘꤛꤢꤩ ꤜꤤ꤬ꤕꤜꤢꤪ꤬ ꤛꤢꤩ꤭ꤒꤢ꤬ꤟꤢꤩ꤬꤯ ꤊꤢ꤬ꤛꤢ꤭ꤜꤟꤤ꤬ ꤒꤟꤢꤧ꤬ꤟꤢꤩꤙꤢꤧ꤬ꤟꤢꤩꤏꤛꤣ꤭ ꤍꤟꤥꤕꤚꤟꤢ꤬ꤓꤢꤩ꤬ ꤒꤢ꤬ꤟꤢꤩ꤬ ꤢꤧꤒꤢ꤬ꤊꤤ꤬ ꤢ꤬ꤞꤛꤢ ꤊꤟꤌꤣ꤭ꤜꤟꤢꤪ꤭ ꤕꤚꤢꤧꤜꤢꤨ꤭꤯
ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤒꤟꤢꤧ꤬ꤡꤢꤨ꤭ꤢꤩ꤬ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤢ꤬ꤚꤢꤩ꤬ꤢ꤬ꤊꤛꤢ꤭ ꤗꤢ꤬ ꤙꤤ ꤂꤀꤁꤀ ꤒꤟꤢꤧ꤬ꤔ꤉ꤥꤓꤛꤢ꤬ ꤊꤟꤢꤩꤗꤣ꤭ꤕꤜꤢꤦꤕꤜꤥ꤭ ꤒꤣ꤬ꤕꤚꤟꤢꤧ꤬ ꤢ꤬ꤗ꤉ꤟꤤ꤭ ꤕꤟꤥꤚꤢꤧ꤬ꤢꤪ꤬ꤞꤢꤩ꤭ ꤔꤛꤣ꤬ ꤟꤢꤩꤘꤢꤦ꤬ꤖꤢꤨꤛꤢꤩ꤭꤯
ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤢ꤬ꤥ꤬ ꤃ ꤡꤣ꤬ ꤗꤢ꤬ꤔꤢꤚꤢꤪ ꤓꤛꤢꤩ꤭ꤊꤟꤢꤩꤋ꤉ꤤ ꤘꤢꤧ꤭ꤒꤟꤢ꤭ ꤙꤢꤩ꤬ꤗꤢ꤬ꤟꤢꤪ ꤗꤟꤛꤢ꤬ ꤜꤤ꤬ꤕꤜꤢꤪ꤬ ꤛꤢꤩ꤭ꤚꤢꤪ ꤙꤢꤧ꤬ꤔꤢꤪ꤭ꤢꤩ꤬ ꤗꤟꤢꤩ꤬ꤜꤟꤛꤣ꤭ꤓꤛꤢ꤬ ꤘꤛꤢꤩꤕꤚꤢꤧꤟꤢꤪꤛꤢꤩ꤭꤯ ꤋꤥ꤭ꤑꤟꤢ ꤊꤟꤢꤩꤊꤢꤨ꤭ꤛꤢꤩ꤭ ꤘꤣ ꤘꤢꤪ꤭ꤏꤥ꤬ ꤢ꤬ꤊꤢꤨ꤭ꤗꤢ꤬ ꤒꤟꤢꤧ꤬ ꤤ꤬ꤞꤛꤥꤒꤟꤢ꤭ ꤜꤤ꤬ꤜꤟꤢꤧ꤬ ꤛꤢꤩ꤭ꤞꤤ꤭ꤟꤢꤪ꤯
ꤋꤥ꤭ꤑꤟꤢ ꤘꤣ ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩꤊꤢꤨ꤭ ꤗꤢ꤬ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ ꤔꤢ ꤒꤟꤢꤧ꤬ꤡꤟꤢꤧꤘꤢꤧ꤬ ꤞꤢ꤭ꤚꤛꤢ꤭ ꤗꤢꤙꤥ꤭ ꤕꤚꤟꤢꤧ꤬ꤔꤢ꤬ꤡꤟꤢꤧ ꤢ꤬ꤕꤜꤢꤪꤢ꤬ꤗꤟꤢꤨ꤬ ꤒꤢ꤬ꤟꤢꤩ꤬ ꤡꤛꤣ ꤟꤢꤩꤞꤛꤥꤒꤟꤢ꤭ ꤘꤛꤢꤩꤟꤢꤪ ꤗꤟꤛꤢ꤬ꤕꤟꤥ꤬ꤓꤢꤩ꤬ ꤔꤟꤤ ꤜꤤ꤬ꤕꤜꤢꤪ꤬ꤛꤢꤩ꤭ ꤘꤣ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤘꤤ꤭ꤗꤟꤢꤪꤏꤥ꤬, ꤖꤚꤢꤨ꤬ꤏꤥ꤬, ꤕꤚꤟꤢꤩꤊꤟꤢꤩꤊꤟꤢꤦ꤭ ꤘꤣ ꤡꤤꤜꤟꤛꤢ꤬ꤒꤢ꤬ꤊꤛꤢꤩ꤭ ꤙꤤ ꤖꤢꤧ꤬ꤋꤥ꤬ꤠꤟꤤ꤭ꤗꤣ꤭ ꤞꤤ꤭ꤒꤢ꤬ꤟꤢꤩ꤬꤯ ꤓꤛꤣ꤭ꤚꤢꤪ ꤖꤢꤨ ꤜꤟꤢꤩꤘꤛꤢ꤬ꤔꤟꤌꤣ꤭ꤙꤢꤧ ꤊꤟꤌꤣ꤭ꤘꤣ ꤞꤛꤥꤜꤤ꤬ꤟꤥ꤭ ꤒꤟꤢꤧ꤬ꤟꤢꤩꤞꤛꤥ ꤢ꤬ꤊꤢꤨ꤭ ꤢ꤬ꤑꤢꤩ꤭ ꤚꤢꤪ ꤡꤢꤓꤛꤢ꤬ ꤚꤢ꤭ꤓꤢꤩ꤬ꤟꤢꤪ ꤒꤟꤥꤋꤢ꤭ꤏꤛꤢꤩ ꤜꤤ꤬ꤢꤨ ꤒꤢ꤬ꤟꤢꤩ꤬ ꤞꤢꤧꤑꤢꤩ꤭ꤔꤟꤤꤖꤢꤨꤛꤢꤩ꤭꤯
ꤙꤤ ꤗꤟꤛꤢ꤬ ꤔꤢ ꤕꤚꤟꤢꤩꤛ꤉ꤤ꤬ ꤊꤟꤢꤩꤊꤢꤦ꤭ ꤕꤚꤟꤢꤧ꤬ꤙꤢꤧ꤬ꤕꤟꤛꤢ ꤙꤢꤧ꤬ꤏꤢꤧ꤭ꤋꤢ꤭ꤜꤟꤢꤩ ꤔꤛꤣ꤬ꤗꤢ꤬ ꤔꤢꤪ꤭ꤢꤩ꤬ꤔꤟꤤꤘꤢꤦ꤬ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤜꤤ꤬ꤕꤜꤢꤪ꤬ꤛꤢꤩ꤭ ꤓꤛꤣ꤭ ꤖꤥ꤭ꤊꤤ ꤒꤟꤢꤧ꤬ꤡꤢꤪꤙꤢꤨ꤬ꤡꤢꤪꤙꤢꤧ꤭ ꤒꤢ꤬ꤊꤛꤢꤩ꤭ ꤔꤢꤪ꤭ꤢꤩ꤬ꤘꤢꤦ꤬ ꤊꤢꤨ꤭ꤜꤢ꤭ (ꤜꤢꤧ꤬ꤒꤢꤩ꤬) ꤜꤤ꤬ꤕꤜꤢꤪ꤬ ꤚꤢꤪ ꤊꤢ꤬ꤛꤢ꤭ꤜꤟꤤ꤬ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤒꤢ꤬ꤟꤢꤩ꤬ꤢ꤬ꤑꤢꤩ꤭ ꤊꤟꤢꤩꤊꤢꤨ꤭ ꤊꤟꤢꤩꤊꤜꤢꤪ꤭ ꤔꤢꤪ꤭ ꤢꤩ꤬ꤘꤛꤢꤩ ꤜꤤ꤬ꤜꤟꤢꤧ꤬ꤛꤢꤩ꤭ ꤢ꤬ꤥ꤬ ꤢ꤬ꤗꤛꤢꤩ꤭ꤗꤛꤢꤩ꤭ꤢ꤬ꤡꤣ꤬ꤡꤣ꤬ ꤋꤥꤋꤛꤢꤩ꤭ꤘꤢꤦ꤬ꤜꤢꤨ꤭꤯
ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤕꤟꤥ꤬ꤓꤢꤩ꤬ ꤜꤤ꤬ꤕꤜꤢꤪ꤬ ꤚꤢꤪ ꤡꤢꤓꤛꤢ꤬ꤙꤤ ꤔꤛꤣ꤬ ꤕꤚꤟꤢꤧ꤬ꤊꤚ꤉ꤥ꤭ ꤗꤟꤢꤩ꤬ꤡ꤉ꤟꤥ ꤔꤟꤤꤊꤟꤌꤣ꤭ ꤢꤧ꤬ ꤢ꤬ꤗꤟꤢ ꤞꤢꤚꤢꤘꤢꤨ꤬ ꤒꤢꤨ꤬ꤚꤢꤧ꤬ ꤟꤢꤩꤜꤟꤢꤜꤤ꤭ ꤞꤢꤧꤑꤢꤩ꤭ ꤔꤢ ꤗꤟꤛꤢ꤬ꤜꤤ꤬ꤕꤜꤢꤪ꤬ ꤢ꤬ꤕꤚꤟꤢ꤬ꤓꤢꤩ꤬ꤡꤟꤛꤢ ꤒꤥ꤬ ꤒꤢ꤬ꤟꤢꤩ꤬ ꤖꤢꤨꤛꤢꤩ꤭꤯
“ꤕꤟꤢꤧ꤬ ꤊꤢ꤬ꤛꤢ꤭ꤜꤟꤤ꤬ ꤜꤢ꤭ꤍꤟꤥ ꤒꤢ꤬ꤟꤢꤩ꤬ꤟꤢꤩ꤬ ꤔꤛꤣ꤬ ꤗꤟꤛꤢ꤬ ꤕꤟꤥ꤬ꤓꤢꤩ꤬ꤔꤟꤤ ꤜꤤ꤬ꤕꤜꤢꤪ꤬ꤊꤢꤨ꤬꤭ ꤚꤢ꤭ꤡꤟꤛꤢꤢꤧ꤬ꤒꤥ꤬꤯ ꤗꤢ꤬ꤔꤢꤚꤢꤪ ꤞꤢꤚꤢꤘꤢꤨ꤬ ꤒꤟꤢꤧ꤬ꤒꤟꤢ꤭ꤏꤢ ꤒꤢ꤬ꤔꤢꤩ꤬ ꤋꤥꤋꤛꤢꤩ꤬ ꤕꤟꤥ꤬ꤓꤢꤩ꤬ ꤜꤤ꤬ꤛꤢꤩ꤭ ꤢ꤬ꤞꤛꤢꤔꤢ ꤢꤨ꤭ꤚꤟꤛꤣ꤬ ꤜꤤ꤬ꤕꤜꤢꤪ꤬ ꤒꤥ꤬꤯ ꤢ꤬ꤚꤢꤪ ‘ꤠ’ ‘ဗ’ ꤛꤢꤩ꤭ ꤚꤢ꤭ꤡꤟꤛꤢꤘꤢꤦ꤬ ꤒꤥ꤬”꤯
ꤕꤚꤟꤢꤧ꤬ꤔꤢꤪ꤭ꤢꤩ꤬ꤔꤟꤤ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤜꤤ꤬ꤕꤜꤢꤪ꤬ꤛꤢꤩ꤭ ꤔꤢ ꤊꤢ꤬ꤛꤢ꤭ꤜꤟꤤ꤬ ꤒꤟꤢꤧ꤬ꤘꤛꤢꤊꤛꤢ꤭ ꤢ꤬ꤗꤟꤢ ꤋꤢꤨ꤬ꤙꤛꤢ꤭ꤚꤢꤧ꤬ (ꤕꤢꤪꤜꤢꤨ꤬) ꤟꤢꤩꤏꤥ꤬ ꤘꤢꤦ꤬ ꤢ꤬ꤒꤟꤢꤧ꤬ ꤗꤛꤢꤓꤛꤢꤩ꤬ꤔꤢ “ꤙꤤꤛꤢꤩ꤭ ꤒꤢ꤬ꤊꤛꤢꤩ꤭ꤗꤢ꤬ ꤔꤢꤪ꤭ꤢꤩ꤬ꤢꤧꤜꤣ ꤒꤢ꤬ꤕꤜꤢꤩ꤯ ꤔꤢꤪ꤭ꤢꤩ꤬ꤏꤢ꤭ꤕꤚꤟꤢꤧ ꤔꤟꤤꤢꤧ꤬ꤢꤧ꤬꤯ ꤊꤟꤢꤩꤊꤢꤨ꤭ ꤊꤟꤢꤩꤊꤜꤢꤪ꤭ ꤜꤟꤢꤩꤔꤢꤪ꤭ꤢꤩ꤬ꤔꤟꤤꤜꤟꤢꤪ꤭ ꤢ꤬ꤑꤢꤩ꤭ꤗꤢ꤬ ꤢ꤬ꤕꤟꤛꤢꤢ꤬ꤏꤢꤧ꤭ ꤜꤢ꤭ꤕꤢ꤭꤯ ꤗꤟꤢꤩ꤬ꤒꤢ꤬ꤖꤟꤌꤣ ꤒꤟꤛꤣ꤭ ꤗꤢ꤬ ꤢ꤬ꤔꤟꤤꤑꤢ꤭ꤒꤥ꤬꤯"
ꤊꤢꤨ꤭ꤜꤢ꤭ ꤜꤤ꤬ꤕꤜꤢꤪ꤬ ꤜꤢꤧ꤬ꤒꤢꤩ꤬ ꤔꤛꤣ꤬ ꤖꤥ꤭ꤊꤤ ꤊꤢꤧ꤭ꤒꤢ꤬ꤜꤤ ꤒꤟꤢꤧ꤬ꤡꤢꤪꤙꤢꤨ꤬ꤡꤢꤪꤙꤢꤧ꤭ ꤢ꤬ꤜꤟꤢꤩꤕꤚꤟꤢ꤬ꤓꤢꤩ꤬ ꤔꤢ ꤜꤢ꤭ꤍꤟꤥ ꤗꤢ꤬ꤔꤢꤚꤢꤪ ꤔꤢꤪ꤭ꤢꤩ꤬ꤔꤢ ꤜꤤ꤬ꤜꤟꤢꤧ꤬ꤛꤢꤩ꤭ ꤔꤛꤣ꤬ ꤟꤢꤩꤥ꤬ꤔꤢ ꤒꤥ꤬꤯
ꤘꤣ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩꤊꤢꤨ꤭ ꤥ꤬ꤖꤢꤦ꤬꤉ꤥꤔꤢ ꤖꤥ꤭ꤊꤤ ꤒꤟꤢꤧ꤬ꤡꤢꤪꤙꤢꤨ꤬ꤡꤢꤪꤙꤢꤧ꤭ ꤒꤟꤥꤓꤢꤨ꤭ (ꤞꤢꤧꤊꤢ꤬ꤒꤥ꤬) ꤞꤛꤥꤜꤤ꤬ꤟꤥ꤭ ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩꤏꤥ꤬ ꤘꤢꤦ꤬ꤔꤢ “ꤖꤥ꤭ꤊꤤꤘꤢꤨ꤬ ꤒꤢ꤬ꤟꤢꤩ꤬ ꤔꤢꤪ꤭ꤢꤩ꤬ꤘꤢꤦ꤬ ꤔꤢ ꤊꤢꤨ꤭ꤜꤢ꤭ꤍꤟꤥ ꤚꤢꤪ ꤢꤧ꤭ꤞꤤ꤭ ꤢ꤬ꤑꤢꤩ꤭ ꤢ꤬ꤐꤟꤢꤨ꤭ꤊꤜꤢꤪ꤭꤯ ꤖꤢꤨꤔꤛꤣ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤜꤤ꤬ꤕꤜꤢꤪ꤬ꤛꤢꤩ꤭ ꤖꤛꤢꤩꤔꤢꤪ꤭ꤢꤩ꤬ ꤔꤟꤤꤙꤤ ꤒꤟꤢꤧ꤬ ꤡꤢꤪꤙꤢꤨ꤬ꤡꤢꤪꤙꤢꤧ꤭ ꤢ꤬ꤋꤢꤧ꤭ ꤟꤢꤩꤚꤥ꤭ ꤜꤤ꤬ ꤢ꤬ꤋꤢꤧ꤭, ꤟꤢꤪ꤭ꤒꤢ꤬ꤚꤢ꤭ ꤢ꤬ꤋꤢꤧ꤭ ꤞꤤ꤭ꤕꤚꤢꤧ꤯ ꤗꤢ꤬ꤔꤢ ꤕꤟꤢꤧ꤬ ꤖꤛꤢꤩꤢꤩ꤬ ꤗꤢꤒꤢꤩ꤭ ꤜꤢ꤭ꤟꤤꤔꤢ ꤊꤢ꤬ꤛꤢ꤭ꤜꤟꤤ꤬ ꤜꤤ꤬ꤜꤟꤢꤧ꤬ꤒꤥ꤬”꤯
ꤊꤢ꤬ꤛꤢ꤭ꤒꤢ꤬ꤟꤢꤩ꤬ ꤟꤢꤩꤘꤢꤦ꤬ ꤔꤢ ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤕ꤉ꤟꤥ꤭ꤒꤢ꤬ꤓꤢꤦ꤭ ꤙꤢꤩ꤬ꤗꤢꤘꤢꤦ꤬ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤕꤟꤥ꤬ꤓꤢꤩ꤬ ꤜꤤ꤬ꤜꤟꤢꤧ꤬ ꤔꤢ ꤊꤜꤛꤢꤩꤍꤢ꤭ ꤜꤤ꤬ ꤔꤛꤣ꤬ꤚꤢꤪ ꤘꤛꤢꤩꤔꤢꤪ꤭ꤢꤩ꤬ꤔꤟꤢꤩꤘꤢꤦ꤬ ꤘꤣ ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩꤊꤢꤨ꤭ꤒꤥ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤜꤤ꤬ꤜꤟꤢꤧ ꤜꤟꤢꤩꤜꤟꤛꤣ꤭ ꤓꤢꤩ꤬ꤏꤢꤪ꤭ ꤢ꤬ꤑꤢꤩ꤭ꤔꤛꤣ꤬ ꤢ꤬ꤕꤟꤛꤢꤛꤢꤧꤜꤢ꤭꤯ ꤢꤧꤒꤢ꤬ꤊꤤ꤬ ꤊꤢ꤬ꤛꤢ꤭ꤜꤟꤤ꤬ ꤖꤢꤨ ꤘꤣ ꤢ꤬ꤓꤢꤩ꤬ꤡꤛꤣ ꤊꤟꤢꤩꤊꤜꤢꤪ꤭ ꤒꤢ꤬ꤟꤢꤩ꤬ ꤔꤢꤪ꤭ꤢꤩ꤬ꤊꤜꤢꤪ꤭ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤜꤤ꤬ꤛꤢꤩ꤭ ꤗꤢ꤬ꤔꤢ ꤊꤟꤢꤩꤊꤢꤨ꤭ ꤢ꤬ꤑꤢꤩ꤭ ꤜꤟꤢꤩꤔꤢꤪ꤭ ꤢꤩ꤬ꤗꤢ꤬ ꤢ꤬ꤐꤟꤢꤨ꤭ꤔꤢꤒꤥ꤬꤯
ꤘꤣ ꤊꤢ꤬ꤛꤢ꤭ꤜꤟꤤ꤬ꤖꤢꤨ ꤥ꤬ ꤊꤟꤢꤩꤊꤢꤨ꤭ ꤒꤢ꤬ꤟꤢꤩ꤬ ꤢ꤬ꤑꤢꤩ꤭ ꤗꤟꤛꤢ꤬ꤜꤟꤢꤪ꤬ꤋ꤉ꤤ ꤘꤛꤢꤩꤔꤢꤪ꤭ꤢꤩ꤬ꤕꤚꤢꤧꤘꤢꤦ꤬ꤒꤢꤦ ꤗꤟꤛꤢ꤬ ꤜꤤ꤬ꤕꤜꤢꤪ꤬ ꤚꤢꤪ ꤔꤢꤪ꤭ꤢꤩ꤬ꤔꤟꤤ ꤜꤢ꤬ꤟꤛꤢ꤭ꤟꤢꤪ ꤗꤢ꤬ꤔꤢꤚꤢꤪ ꤘꤣ ꤊꤢ꤬ꤛꤢ꤭ꤜꤟꤤ꤬ꤖꤢꤨ ꤥ꤬ꤊꤟꤢꤩꤊꤜꤢꤪ꤭ ꤒꤢ꤬ꤟꤢꤩ꤬ ꤊꤜꤛꤢꤊꤜꤥ꤭ ꤥ꤬ꤟꤤꤘꤣ ꤜꤟꤢꤩꤟꤢꤩꤞꤛꤥ ꤒꤥ꤬꤯ ꤖꤢꤨꤔꤛꤣ꤬ꤚꤢꤪ ꤜꤤ꤬ꤜꤟꤢꤧ꤬ ꤜꤟꤢꤩꤜꤟꤛꤣ꤭ꤓꤢꤩ꤬ ꤔꤟꤤꤢ꤬ꤑꤢꤩ꤭ ꤒꤥ꤭ꤔꤟꤤꤙꤢꤧ꤬ꤚꤟꤢꤩ ꤢ꤬ꤋ꤉ꤢꤢ꤬ꤛꤢ꤬ ꤘꤣ ꤜꤟꤢꤩꤟꤢꤩꤞꤛꤥ ꤢ꤬ꤑꤢꤩ꤭ ꤔꤛꤣ꤬ꤗꤢ꤬ ꤞꤛꤥꤜꤤ꤬ꤟꤥ꤭ꤖꤢꤨ ꤒꤣ꤬ꤕꤚꤟꤢꤧ꤬ ꤟꤢꤩꤘꤢꤦ꤬ꤖꤢꤨꤛꤢꤩ꤭꤯
“ꤊꤟꤢꤩꤊꤜꤢꤪ꤭ ꤒꤢ꤬ꤟꤢꤩ꤬ ꤔꤢꤪ꤭ꤢꤩ꤬ꤘꤢꤦ꤬ ꤞꤢꤚꤢꤘꤢꤨ꤬ ꤓꤢꤧ꤭ꤙꤢꤨ꤭ꤖꤢꤧ꤭ ꤜꤤ꤬ꤕꤜꤢꤪ꤬ ꤙꤤ ꤢ꤬ꤡꤟꤛꤢꤔꤢ ꤢꤧ꤬ꤞꤤ꤭ ꤗꤢ꤬ ꤢ꤬ꤑꤢꤩ꤭ꤜꤢ꤭ꤟꤢꤪ ꤓꤛꤣ꤭ ꤢꤧ꤬ꤞꤤ꤭ ꤢ꤬ꤡꤟꤛꤢꤔꤢꤪ꤭ꤢꤩ꤬ꤕꤚꤢꤧ ꤜꤤ꤬ꤕꤜꤢꤪ꤬ꤛꤢꤩ꤭꤯ ꤊꤤ꤬ꤟꤢꤩꤚꤛꤢꤚꤛꤢ ꤗꤢ꤬ ꤕꤟꤢꤧ꤬ꤒꤥ꤭ ꤔꤢꤪ꤭ꤢꤩ꤬ꤊꤛꤢ꤭ꤕꤚꤢꤧ ꤗꤟꤛꤢ꤬ꤜꤤ꤬ꤕꤜꤢꤪ꤬ ꤛꤢꤩ꤭ꤚꤢꤪ ꤜꤤ꤬ꤜꤟꤢꤧ꤬ ꤔꤢ ꤒꤟꤢꤧ꤬ꤡꤟꤢꤧꤘꤢꤧ꤬ꤞꤢ꤭ꤚꤛꤢ꤭ ꤢ꤬ꤕꤜꤢꤪꤗꤟꤢꤨ꤬ ꤔꤛꤣ꤬ ꤡꤛꤣꤟꤢꤩꤞꤛꤥ ꤙꤢꤧꤘꤣ ꤊꤟꤢꤩꤊꤜꤢꤪ꤭ ꤗꤢ꤬ ꤢ꤬ꤚꤛꤢ ꤔꤛꤢ꤬ꤡꤢꤪ꤯ ꤒꤥ꤭ ꤟꤢꤩꤏꤥ꤬ꤒꤟꤢ꤭ꤕꤜꤢꤨ ꤙꤢꤧꤊꤟꤌꤣ꤭ ꤢꤧ꤬ꤞꤤ꤭꤯ ꤋꤥ꤭ꤑꤟꤢ ꤊꤟꤢꤩꤊꤜꤢꤪ꤭ ꤒꤢ꤬ꤟꤢꤩ꤬ ꤔꤛꤣ꤬ꤗꤢ꤬ ꤔꤢꤪ꤭ꤢꤩ꤬ꤔꤟꤤ ꤕꤢ꤭ ꤢꤧ꤬ꤞꤤ꤭ ꤔꤢꤪ꤭ꤢꤩ꤬ꤡꤟꤛꤢꤔꤟꤤ ꤜꤤ꤬ꤜꤟꤢꤧ꤬ ꤔꤛꤣ꤬ꤚꤢꤪ ꤕꤟꤢꤧ꤬ ꤜꤟꤢꤪꤕꤜꤤ꤭ ꤊꤟꤢꤦꤡꤢꤨ꤭ꤢꤩ꤬ ꤒꤟꤣꤡꤟꤛꤢꤜꤢꤨ꤭ ꤢ꤬ꤑꤢꤩ꤭ ꤡꤛꤣꤤ꤬ꤞꤛꤥ ꤒꤟꤢ꤭ꤙꤢꤧ ꤢꤧ꤬ꤞꤤ꤭ꤗꤢ꤬ ꤢꤧ꤬ꤞꤤ꤭ꤡꤢꤨ꤭ꤢꤩ꤬ ꤡꤟꤛꤢꤊꤟꤌꤣ꤭ ꤕꤚꤢꤧ”꤯
