ꤙꤤꤔꤛꤣ꤬ꤢ꤬ꤋꤢꤧ꤭ ꤓꤢꤩ꤬ꤊꤢ꤬ꤒꤟꤢ꤭ꤊꤟꤌꤣ꤭ ꤘꤣ ꤜꤟꤥꤡꤢꤧ ꤢ꤬ꤜꤢꤧ꤭ ꤓꤛꤣ꤭ ꤗꤛꤢꤊꤟꤢ꤬ꤗꤛꤢꤟꤛꤢ꤭ꤊꤟꤌꤣ꤭ ꤢ꤬ꤋꤢꤧ꤭ ꤙꤤ ꤖꤢꤧ꤬ꤋꤥ꤬ꤠꤟꤤ꤭ꤊꤢꤨ꤭ ꤜꤟꤥꤡꤢꤧ ꤜꤟꤢꤩꤥ꤬ꤊꤟꤌꤣꤘꤛꤢꤩ ꤋꤢ꤭ꤜꤟꤢꤩꤔꤛꤣ꤬ꤗꤢ꤬ ꤕꤚꤟꤢꤧ꤬ꤏꤤ꤬ꤘꤛꤢ ꤜꤟꤥꤡꤢꤧ ꤒꤢ꤬ꤟꤢꤩ꤬ ꤢ꤬ꤥ꤬ꤚꤟꤥꤜꤣꤊꤜꤢꤪ꤭ ꤔꤢ ꤗꤛꤢꤓꤛꤢꤩ꤬ꤔꤢꤪ ꤒꤢ꤬ꤗꤥ꤭ ꤘꤣ ꤢ꤬ꤚꤟꤢꤩꤋꤢꤧ꤭ꤔꤛꤣ꤬꤯ ꤕꤚꤟꤢꤧ꤬ꤡꤛꤣꤊꤜꤛꤢ ꤒꤢ꤬ꤟꤢꤩ꤬ꤟꤢꤩ꤬ ꤗꤢ꤬ ꤢ꤬ꤏꤤ꤬ꤘꤛꤢꤟꤛꤢ꤭ꤔꤢ ꤓꤢꤪ꤬ꤜꤢ꤬ꤡꤤ꤬ ꤡꤢꤧ꤯ ꤓꤛꤣ꤭ ꤒꤢ꤬ꤟꤢꤩ꤬ꤟꤢꤩ꤬ ꤗꤢ꤬ ꤢ꤬ꤟꤛꤢ꤭ꤊꤟꤌꤣ꤭ꤔꤢ ꤜꤟꤥꤡꤢꤧꤘꤢꤨ꤬꤯ ꤚꤢꤪ ꤒꤢ꤬ꤊꤜꤢꤪ ꤕꤢ꤭ꤗꤢ꤬ ꤢ꤬ꤏꤤ꤬ꤘꤛꤢꤟꤛꤢ꤭ꤘꤢꤦ꤬ ꤔꤢ ꤢ꤬ ꤗꤢꤪ꤬ꤒꤢꤪ꤬ꤏꤣꤧ꤬ꤊꤢꤧ꤬꤯ ꤙꤤꤔꤛꤣ꤬ꤢ꤬ꤋꤢꤧ꤭ ꤊꤢ꤬ꤛꤢ꤭ ꤒꤢ꤬ꤟꤢꤩ꤬ꤟꤢꤩ꤬ ꤗꤢ꤬ ꤢ꤬ꤡꤛꤣꤢꤧ ꤒꤢ꤬ꤞꤤꤜꤟꤥ ꤓꤛꤣ꤭ ꤢ꤬ꤏꤤ꤬ꤘꤛꤢ ꤊꤢ꤬ꤔꤟꤌꤣ꤭ ꤜꤢ꤭ꤘꤣ ꤠꤟꤤ꤭ꤊꤢꤨ꤭ ꤔꤛꤣ꤬ꤗꤢ꤬ ꤗꤛꤢꤓꤛꤢꤩ꤬ꤙꤢꤧ꤬ꤖꤢꤨꤛꤢꤩ꤭꤯

ꤊꤢ꤬ꤛꤢ꤭ꤒꤢ꤬ꤟꤢꤩ꤬ ꤢ꤬ꤥ꤬ꤚꤟꤥ ꤜꤣꤊꤜꤢꤪ꤭ ꤔꤢ ꤘꤣ ꤢ꤬ꤚꤟꤢꤩꤔꤛꤣ꤬ꤚꤢꤪ ꤡꤛꤣꤏꤢꤨ꤬ꤘꤛꤢ꤭ ꤗꤛꤢ ꤜꤟꤛꤢ꤭ꤋꤛꤢꤩ꤭ꤗꤟꤌꤣ ꤘꤣ ꤢ꤬ꤜꤟꤢꤩꤊꤜꤥ꤭ꤥ꤬ꤙꤤ ꤖꤢꤧ꤬ꤋꤥ꤬ꤠꤟꤤ꤭ꤛꤢꤩ꤭ ꤒꤢ꤬ꤕꤚꤟꤢꤧ꤬ ꤗꤢ꤬ ꤢ꤬ꤘꤛꤢꤏꤥ꤬ꤕꤟꤢꤩꤔꤢ “ ꤢꤨ꤭ꤗꤟꤢꤩ꤬ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ ꤙꤤꤛꤢꤩ꤭ꤔꤟꤤ꤯ ꤖꤢꤨꤔꤛꤣ꤬ꤚꤢꤪ ꤕ꤉ꤟꤥꤒꤢ꤬ꤕꤚꤟꤢꤧ꤬ ꤢ꤬ꤒꤟꤢꤧ꤬ꤗꤟꤢꤩ꤬ꤏꤢꤨꤏꤢꤜꤟꤢꤪ꤭ꤕꤜꤤ꤭꤯ ꤚꤢꤪ ꤒꤣ꤬ꤔꤢ꤬ ꤔꤢ ꤒꤢ꤬ꤖꤥ꤬ꤖꤥ꤬ ꤢ꤬ꤗꤟꤢꤩ꤬ꤕꤢ꤭" ꤟꤢꤩꤏꤥ꤬ꤘꤢꤦ꤬ ꤖꤢꤨꤛꤢꤩ꤭ꤔꤛꤣ꤬꤯

ꤕꤚꤟꤢꤧ꤬ꤘꤣ ꤢ꤬ꤡꤛꤣꤊꤟꤢ꤬ꤡꤛꤣꤟꤛꤢ꤭ ꤢꤧꤑꤢ꤬ꤡꤢꤪ ꤙꤤ ꤖꤢꤧ꤬ꤋꤥ꤬ꤠꤟꤤ꤭ ꤊꤜꤛꤢꤜꤥ꤬ ꤔꤛꤣ꤬ꤒꤢ꤬ꤊꤜꤢꤪ ꤗꤢ꤬ ꤢ꤬ꤗꤟꤢꤟꤢꤪ ꤢ꤬ꤟꤛꤢ꤭ꤥ꤬ꤜꤢꤩ꤭ ꤊꤟꤌꤣ꤭ꤙꤤ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ ꤕ꤉ꤢꤧ꤬ꤛꤢꤩ꤭ ꤔꤛꤣ꤬ꤠꤟꤢ ꤔꤛꤣ꤬ꤗꤢ꤬ ꤞꤢꤧꤑꤢꤩ꤭ ꤒꤟꤢ꤭ꤕꤜꤢꤨꤊꤛꤢ꤭ ꤖꤢꤨꤛꤢꤩ꤭꤯ ꤚꤢꤪ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ ꤔꤛꤣ꤬ꤗꤢ꤬ ꤙꤤ ꤢꤩ꤬ꤕꤚꤤ꤬ꤜꤢꤧ꤭ ꤢ꤬ꤞꤢꤧ꤭ (꤁꤀)ꤔꤛꤣ꤬꤯

ꤕ꤉ꤢꤧ꤬ꤛꤢꤩ꤭ ꤗꤟꤢꤩ꤬ꤟꤛꤢ꤭ꤘꤛꤢꤩꤟꤢꤪ ꤕ꤉ꤟꤥꤔꤢ꤬ꤔꤢ꤬ ꤔꤢ ꤋꤢ꤭ꤜꤟꤢꤩ ꤒꤢ꤬ꤖꤥ꤬ꤓꤛꤣ꤭ꤒꤢ꤬ꤖꤥ꤬ ꤚꤢꤪ ꤒꤟꤛꤣꤛꤢꤩ꤭ꤋꤥ꤭ꤑꤟꤢ ꤗꤢ꤬ ꤢ꤬ꤥ꤬ꤟꤢꤪ ꤁꤁ ꤟꤢꤦ꤬꤯ ꤓꤛꤣ꤭ ꤙꤤ ꤂꤀꤁꤁ ꤔꤢ꤬ ꤢ꤬ꤊꤢꤨ꤭ꤛꤢꤩ꤭ ꤗꤢ꤬ ꤗꤟꤢꤩ꤬ꤘꤛꤢꤩꤟꤢꤪꤙꤤ ꤖꤢꤧ꤬ꤋꤥ꤬ꤠꤟꤤ꤭ ꤛꤢꤩ꤭ꤔꤛꤣ꤬꤯ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤢ꤬ꤚꤢꤩ꤬ ꤕꤚꤟꤢꤧ꤬ꤋꤛꤢꤋꤢꤨ꤬ ꤜꤢꤪ꤭ꤚꤢꤩ꤭ ꤗꤢ꤬ ꤢ꤬ꤡ꤉ꤤ꤬ꤋꤢꤨ꤬ꤊꤜꤢꤪ ꤋꤢꤨ꤬ꤊꤜꤛꤢ꤭ꤚꤢꤪ ꤢ꤬ꤗꤟꤢꤩ꤬ꤓ꤉ꤟꤥ꤭ꤓꤛꤢ꤬ꤘꤛꤢꤩꤟꤢꤪ ꤕ꤉ꤢꤧ꤬ꤛꤢꤩ꤭ꤔꤛꤣ꤬꤯

ꤕꤚꤟꤢꤧ꤬ꤋꤛꤢꤋꤢꤨ꤬ ꤜꤢꤪ꤭ꤚꤢꤩ꤭ ꤟꤢꤩꤔꤢ “ ꤊꤢꤦꤚꤟꤢꤩ ꤙꤢꤩ꤬ꤘ꤉ꤥꤚꤛꤢ ꤕꤟꤢꤦꤊꤜꤢꤪ꤬ꤗꤢ꤬ ꤥ꤬ꤔꤟꤤ ꤜꤟꤛꤢ꤭ꤋꤛꤢꤩ꤭ ꤍꤟꤥꤟꤢꤩꤙꤢꤧ꤬ ꤔꤢ ꤜꤤ꤬ꤜꤟꤢꤧ꤬ ꤔꤢ ꤢ꤬ꤊꤢꤦꤚꤟꤢꤩ ꤏꤤ꤭ꤗꤟꤢꤩꤒꤥ꤬ꤢ꤬ꤑꤢꤩ꤭, ꤓꤛꤣ꤭ꤚꤢꤪ ꤊꤢꤦꤚꤟꤢꤩ ꤗꤟꤢꤩ꤬ꤘꤢꤨ꤬ꤓꤛꤢ꤬ꤓꤢꤨ꤭ꤓꤛꤢ꤬ ꤢ꤬ꤑꤢꤩ꤭꤯ ꤜꤟꤛꤢ꤭ꤋꤛꤢꤩ꤭ ꤜꤟꤢꤩꤊꤜꤥ꤭ꤜꤟꤢꤩꤋꤛꤢ꤬ ꤗꤟꤌꤣꤚꤥ꤬ꤖꤢꤧ꤭ꤚꤛꤢ꤭ ꤒꤢ꤬ꤟꤢꤩ꤬ ꤗꤢ꤬ ꤊꤢꤦꤚꤟꤢꤩ ꤖꤛꤢꤩꤥ꤬ꤘ꤉ꤥꤚꤛꤢ ꤔꤢ ꤐꤟꤢꤨꤒꤟꤢ꤭ꤕꤜꤢꤩ꤬ꤟꤛꤢ꤭ꤕꤟꤢꤩꤊꤟꤌꤣ꤭ ꤕꤚꤟꤢꤧ꤬ꤔꤢ꤬ꤡꤟꤢꤧ ꤓꤛꤢ꤬ꤞꤢꤧ꤭ ꤒꤢ꤬ꤊꤜꤢꤪ ꤢ꤬ꤑꤢꤩ꤭ ꤔꤛꤣ꤬ꤗꤢ꤬ ꤕꤟꤢꤧ꤬ ꤒꤟꤢꤧ꤬ꤐꤢꤩ꤬ꤔꤟꤢꤩ꤬ꤕꤜꤤ ꤥ꤬ꤖꤢꤨꤛꤢꤩ꤭" ꤯

ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤒꤢ꤬ꤊꤜꤢꤪ ꤗꤢ꤬ ꤢ꤬ꤞꤢꤧꤑꤢꤩ꤭ꤘꤛꤢꤩꤕꤢ꤭ ꤢ꤬ꤗꤟꤌꤣꤚꤥ꤬ꤖꤢꤧ꤭ꤚꤛꤢ꤭ ꤒꤥ꤬ ꤓꤛꤣ꤭ ꤢ꤬ꤡꤟꤛꤢꤘꤛꤢꤩꤕꤢ꤭ ꤜꤟꤛꤢ꤭ꤋꤛꤢꤩ꤭ ꤜꤤꤜꤟꤢꤧ꤬ꤒꤥ꤬ꤗꤢ꤬ ꤒꤢ꤬ꤊꤜꤛꤢ꤬ꤔꤢ ꤢ꤬ꤥ꤬ꤢꤧꤓꤛꤢ꤬ ꤔꤢ ꤥ꤬ꤢꤧꤓꤛꤢ꤬꤯ ꤕꤚꤟꤢꤧ꤬ꤘꤣ ꤢ꤬ꤥ꤬ ꤠꤟꤤ꤭ꤊꤢꤨ꤭ ꤒꤢ꤬ꤊꤜꤢꤪ ꤗꤢ꤬ ꤢ꤬ꤟꤢꤩꤙꤢꤧ꤬ꤘꤛꤢꤩꤕꤢ꤭ ꤜꤟꤛꤢ꤭ꤋꤛꤢꤩ꤭ꤍꤟꤥ ꤒꤥ꤬ꤚꤢꤪ ꤒꤢ꤬ꤟꤢꤩ꤬ꤟꤢꤩ꤬ ꤗꤢ꤬ ꤢ꤬ꤞꤢꤧꤑꤢꤩ꤭ꤊꤟꤌꤣ꤭ꤕꤢ꤭ ꤗꤢ꤬ꤔꤢꤚꤢꤪ ꤢ꤬ꤟꤢꤩꤙꤢꤧ꤬ꤓꤢꤩ꤬ꤏꤢꤦ꤬ꤡꤟꤛꤢꤕꤢ꤭ꤒꤥ꤬ ꤔꤛꤣ꤬ꤗꤢ꤬ ꤢ꤬ꤥ꤬ꤚꤟꤥꤜꤢ꤭ꤟꤢꤪ꤯

ꤢ꤬ꤓ꤉ꤟꤥ꤭ꤓꤛꤢ꤬ꤖꤢꤨꤛꤢꤩ꤭ ꤔꤛꤣ꤬ꤗꤢ꤬ ꤢ꤬ꤗꤟꤢꤟꤢꤪ ꤊꤜꤛꤢꤩ꤭ꤋ꤉ꤤ ꤘꤣ ꤢ꤬ꤕꤣꤟꤛꤢ꤭ꤘꤛꤢꤩ ꤓꤛꤢꤩ꤭ꤊꤟꤢꤩ ꤔꤛꤣ꤬ ꤢ꤬ꤢꤩ꤬ꤊꤜꤟꤢꤪ꤬ꤢꤩ꤬ꤗꤢ꤬ ꤕꤟꤢꤩꤊꤟꤌꤣ꤭ ꤗꤛꤢꤩ꤭ꤡꤣ꤬ꤖꤢꤨ ꤜꤤ꤬ꤜꤟꤢꤧ꤬ꤒꤥ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤚꤢꤪ ꤢ꤬ꤏꤤ꤭ꤗꤟꤢꤩꤊꤛꤢ꤭ ꤔꤛꤣ꤬ꤗꤢ꤬ ꤙꤤ ꤁꤉꤉꤀ ꤔꤢ꤬ ꤢ꤬ꤋꤢꤧ꤭ ꤕꤚꤟꤢꤧ꤬ꤘꤣ ꤢ꤬ꤓꤛꤢ꤬ꤔꤟꤌꤣ꤭ ꤔ꤉ꤥꤔꤟꤤꤊꤟꤌꤣ꤭ ꤢ꤬ꤔꤟꤢꤩꤙꤤ ꤖꤢꤧ꤬ꤋꤥ꤬ ꤕꤚꤟꤢꤧ꤬ꤒꤛꤢꤔꤟꤢꤩ ꤢ꤬ꤗꤟꤢ ꤜꤟꤛꤢ꤭ꤋꤛꤢꤩ꤭ꤖꤢꤧ꤭ ꤋꤥ꤭ꤗꤢ꤭ꤚꤊꤥ꤬ꤙꤢ꤭ ꤟꤢꤩꤘꤢꤦ꤬ꤖꤢꤨꤛꤢꤩ꤭ꤔꤛꤣ꤬꤯

ꤢ꤬ꤟꤢꤩꤔꤢ “ꤔꤢꤖ ꤓꤢꤦ꤭ꤋꤢꤧ꤭ ꤔꤢ ꤖꤏꤕꤜ ꤓꤢꤦ꤭ꤋꤢꤧ꤭ ꤔꤛꤣ꤬ꤗꤢ꤬ ꤟꤢꤩꤕꤢ꤭ꤘꤣ ꤢ꤬ꤊꤢꤦꤚꤟꤢꤩ ꤢꤩ꤬ꤊꤜꤟꤢꤪ꤬ꤢꤩ꤬ꤗꤢ꤬ ꤕꤟꤢꤩ ꤕꤟꤢꤧ꤬ ꤗꤛꤢꤩ꤭ꤡꤣ꤬ꤖꤢꤨ ꤒꤢ꤬ꤊꤜꤢꤪ ꤒꤢꤧ꤭ꤗꤟꤢꤩ, ꤢꤧ꤬ꤞꤤ꤭ꤗꤢ꤬ ꤢ꤬ꤔꤢꤪ꤭ꤢꤩ꤬ꤘꤣ ꤗꤛꤢꤩ꤭ꤡꤣ꤬ꤘꤢꤨ꤬ ꤊꤢꤦꤢꤩ꤬ꤙꤤꤊꤛꤢ꤭ ꤔꤛꤣ꤬ꤒꤢ꤬ꤊꤛꤢꤩ꤭꤯ ꤢ꤬ꤗꤟꤢꤩ꤬ꤙꤤ ꤊꤛꤢ꤭ ꤗꤛꤢꤩ꤭ꤡꤣ꤬ꤖꤢꤨ ꤒꤢ꤬ꤊꤜꤢꤪ ꤢ꤬ꤜꤤ꤬ꤢ꤬ꤜꤟꤢꤧ꤬꤯ ꤒꤟꤢꤧ꤬ꤡꤟꤢꤧꤘꤢꤧ꤬ ꤞꤢ꤭ꤚꤛꤢ꤭ ꤒꤢ꤬ꤊꤜꤢꤪ ꤗꤢ꤬ ꤢꤧ꤬ꤞꤤ꤭ ꤗꤟꤢꤩ꤬ꤡꤛꤣꤊꤛꤢ꤭ꤖꤢꤨ ꤢꤧ꤬ꤞꤤ꤭ ꤢ꤬ꤒꤟꤢꤧ꤬ꤞꤢꤧꤐꤟꤢꤦ ꤥ꤬ꤔꤛꤣ꤬꤯ ꤢ꤬ꤘꤛꤢ꤬ꤥ꤬ꤕꤟꤢꤩꤊꤟꤌꤣ꤭ꤕꤢ꤭ ꤗꤛꤢꤩ꤭ꤡꤣ꤬ꤖꤢꤨ ꤒꤢ꤬ꤡꤣ꤬ꤔꤢꤒꤢ꤬ꤡꤣ꤬ ꤢ꤬ꤒꤟꤢꤧ꤬ꤥ꤬ꤜꤟꤛꤣ꤭ꤔꤛꤣ꤬ꤒꤥ꤬, ꤢ꤬ꤗꤟꤢꤩ꤬ꤕꤛꤢꤩꤊꤛꤢ꤭ꤜꤟꤢꤪ꤭" ꤟꤢꤩꤖꤢꤨꤛꤢꤩ꤭ꤔꤛꤣ꤯꤬

ꤜꤟꤛꤢ꤭ꤋꤛꤢꤩ꤭ ꤔꤛꤣ꤬ꤗꤢ꤬ ꤢ꤬ꤕꤢ꤬ꤔꤟꤌꤣ꤭ꤊꤟꤌꤣꤙꤤ ꤊꤢ꤬ꤛꤢ꤭ꤜꤟꤤ꤬ (ꤊꤢ꤬ꤚꤢꤩ꤬ꤔꤤ꤬) ꤗꤛꤢꤩ꤭ꤡꤣ꤬ꤖꤢꤨ ꤢ꤬ꤊꤜꤢꤧ꤭ ꤔꤛꤣ꤬ꤒꤢ꤬ꤡꤣ꤬ ꤓꤛꤣ꤭ ꤕꤚꤟꤢꤧ꤬ꤜꤟꤢꤪꤕꤜꤤ꤭ ꤊꤢꤦ ꤥ꤬ꤏꤤ꤭ꤕꤚꤟꤣ ꤏꤤ꤭ꤕꤚꤛꤢ꤭ ꤜꤢꤨ꤭ꤒꤥ꤬, ꤔꤢ ꤒꤟꤢꤧ꤬ꤞꤢꤧꤑꤢꤩ꤭ ꤒꤟꤢ꤭ꤞꤢꤦꤜꤢꤨ꤭ ꤙꤢꤧ꤬ꤥ꤬ꤒꤥ꤬ ꤓꤛꤣ꤭ ꤗꤛꤢꤩ꤭ꤡꤣ꤬ꤔꤢ ꤒꤢ꤬ꤡꤣ꤬ ꤗꤢ꤬ ꤢ꤬ꤘꤢꤨ꤬ꤙꤢꤧ꤬ꤙꤢꤧ꤬ ꤢ꤬ꤕꤢ꤬ꤒꤤꤙꤢꤧ꤬ꤙꤢꤧ꤬ ꤢ꤬ꤜꤥ꤬ꤘꤢꤨ꤬ꤜꤣꤘꤣ ꤙꤢꤧ꤬ꤘꤛꤢ꤬ꤥ꤬ ꤗꤛꤢꤩ꤭ꤡꤣ꤬ꤖꤢꤨ ꤞꤢꤧꤕꤜꤢꤪ꤬ ꤔꤛꤣ꤬ꤗꤢ꤬ ꤋꤥ꤭ꤗꤢ꤭ꤚꤊꤥ꤬ꤙꤢ꤭ ꤟꤢꤩꤖꤢꤨꤛꤢꤩ꤭꤯

ꤢ꤬ꤟꤢꤩꤕꤜꤢꤩ꤬ꤟꤛꤢ꤭ ꤕꤟꤥꤔꤢ “ꤜꤟꤛꤢ꤭ꤋꤛꤢꤩ꤭ ꤔꤛꤣ꤬ꤗꤢ꤬ ꤕꤣꤊꤢꤦ꤭ ꤢ꤬ꤊꤜ꤉ꤤ꤭ꤗꤢ꤬ ꤢ꤬ꤗꤟꤢꤗꤟꤢ, ꤊꤢ꤬ꤛꤢ꤭ꤜꤟꤤ꤬ (ꤊꤢ꤬ꤚꤢꤩ꤬ꤔꤤ꤬) ꤗꤛꤢꤩ꤭ꤡꤣ꤬ꤖꤢꤨ ꤗꤢ꤬ ꤢ꤬ꤗꤟꤢꤗꤟꤢ꤯ ꤙꤢꤧ꤬ꤗꤟꤥ꤬ꤘꤛꤢꤩ ꤗꤛꤢꤩ꤭ꤡꤣ꤬ꤖꤢꤨ ꤚꤢꤪ ꤙꤢꤧ꤬ꤙꤢꤪꤞꤛꤥꤋꤢꤧꤋꤥ꤭ ꤊꤟꤌꤣ꤭ ꤕꤟꤌꤣꤠꤟꤛꤢꤘꤣ ꤢ꤬ꤚꤟꤛꤣ꤬ꤒꤢ꤬ꤊꤜꤢꤪ ꤞꤛꤢꤖꤢꤨ ꤕꤟꤌꤣꤠꤟꤛꤢ ꤒꤢ꤬ꤒꤢꤪ꤬ꤔꤛꤣ꤬꤯ ꤊꤤ꤬ꤘꤢ꤭ꤔꤢ ꤗꤛꤢꤩ꤭ꤡꤣ꤬ꤖꤢꤨ ꤜꤟꤢꤪꤕꤜꤤ꤭ ꤊꤤ꤬ ꤙꤢꤪꤞꤛꤥ ꤋꤢꤧꤋꤥ꤭ꤜꤢꤨ꤭ ꤙꤢꤩ꤬ꤐꤟꤢꤦꤙꤢꤩ꤬ꤑꤟꤢ ꤋꤛꤢꤩ꤭ꤜꤢꤨ꤭ ꤟꤢꤩꤔꤛꤣ꤬ꤗꤢ꤬ ꤒꤢꤦ ꤕꤟꤢꤧ꤬ ꤤ꤬ꤏꤢꤪꤓꤛꤢ꤬ꤙꤢꤧꤘꤛꤢꤩ ꤓꤛꤢꤩ꤭ꤊꤟꤢꤩꤕꤜꤢꤪꤡꤢꤦ꤭ ꤞꤢꤧꤕꤜꤢꤪ꤬ ꤕꤚꤢꤧ꤯ ꤓꤛꤣ꤭ ꤕꤟꤢꤧ꤬ ꤗꤟꤢꤩ꤬ꤒꤢ꤬ꤚꤢꤪ꤬ꤞꤢꤧ ꤏꤢꤦ꤬ ꤙꤢꤧꤋꤛꤢꤩ꤭ ꤊꤜꤛꤢꤩ꤭ꤒꤟꤢꤧ꤬ꤕꤣꤒꤢ꤬ꤚꤤ ꤓꤛꤣ꤭ ꤕꤟꤢꤧ꤬ ꤗꤟꤢꤩ꤬ꤓꤛꤢ꤬ꤙꤢꤧ ꤘꤤ꤬ꤗꤥ꤬ꤊꤢ꤬ꤚꤢꤩ꤬ꤎꤤ꤬ ꤓꤛꤢꤩ꤭ꤊꤟꤢꤩꤕꤢ꤭"

ꤙꤤ ꤊꤢ꤬ꤛꤢ꤭ꤜꤟꤤ꤬ (ꤊꤢ꤬ꤚꤢꤩ꤬ꤔꤤ꤬) ꤗꤛꤢꤩ꤭ꤡꤣ꤬ꤖꤢꤨ ꤢ꤬ꤊꤜꤢꤧ꤭ ꤊꤢ꤬ꤛꤢ꤭, ꤊꤢ꤬ꤛꤢꤪ, ꤊꤢ꤬ꤛꤢ ꤜꤟꤛꤢ꤭ꤋꤛꤢꤩ꤭ ꤢ꤬ꤥ꤬ꤓꤛꤣ꤭ ꤙꤤ ꤊꤢ꤬ꤛꤢ ꤜꤟꤛꤢ꤭ꤋꤛꤢꤩ꤭ ꤢ꤬ꤊꤢꤨ꤭ ꤊꤢ꤬ꤛꤢ ꤊꤢ꤬ꤍꤢ꤬, ꤊꤢ꤬ꤛꤢ꤭ꤜꤢ꤬ꤓꤢ꤬, ꤊꤢ꤬ꤛꤢ꤭ꤊꤢ꤬ꤘꤢꤪ ꤔꤢ ꤊꤢ꤬ꤛꤢ꤭ꤜꤢ꤬ꤟ꤉ꤤ꤬ ꤢ꤬ꤕꤢ꤬ꤔꤟꤌꤣ꤭ꤊꤟꤌꤣ꤭ ꤙꤤꤔꤛꤣ꤬꤯ ꤜꤟꤛꤢ꤭ꤋꤛꤢꤩ꤭ ꤊꤢ꤬ꤛꤢ ꤗꤛꤢꤩ꤭ꤡꤣ꤬ ꤥ꤬ꤜ꤉ꤟꤤ꤭ꤡꤣ꤬ ꤛꤢꤩ꤭ ꤢ꤬ꤏꤢꤪꤒꤟꤢ꤭ꤥ꤬ꤜꤟꤛꤢ꤬ ꤟꤢꤪꤙꤤ ꤕꤚꤟꤢꤩꤔꤥꤊꤟꤢꤩ, ꤕꤣꤊꤢꤦ꤭ꤊꤟꤢꤩ, ꤊꤢ꤬ꤛꤢ꤭ꤜꤟꤤ꤬ ꤊꤟꤢꤩ ꤔꤢ ꤗꤢ꤭ꤘꤢ꤬ꤜꤢꤩ꤭ ꤋꤢ꤭ꤜꤟꤢꤩ ꤙꤤꤔꤛꤣ꤬ꤚꤢꤪ ꤥ꤬ꤐꤛꤢꤩ꤬ꤋꤛꤢꤩ꤭ꤜꤢꤨ꤭ ꤓꤛꤣ꤭ ꤜꤟꤢꤩꤗꤛꤢꤓꤛꤢꤩ꤬ꤙꤢꤧꤋꤛꤢꤩ꤭ꤜꤢꤨ꤭ ꤗꤢ꤬ ꤢ꤬ꤕꤟꤛꤢꤢ꤬ꤏꤢꤧ꤭ꤥ꤬ꤜꤢ꤭꤯

ꤜꤟꤛꤢ꤭ꤋꤛꤢꤩ꤭ ꤋꤢꤨ꤬ꤊꤜꤢꤪꤘꤢꤨ꤬ꤋꤢꤨ꤬ ꤒꤢ꤬ꤟꤢꤩ꤬ ꤘꤣ ꤢ꤬ꤥ꤬ꤙꤤ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩꤊꤢꤨ꤭ ꤒꤢ꤬ꤊꤜꤢꤪ ꤗꤢ꤬ ꤡꤢꤓꤛꤢ꤬ꤒꤢ꤬ꤚꤤ꤬ ꤒꤢ꤬ꤚꤛꤢ꤭ ꤔꤢ ꤜꤟꤛꤢ꤭ꤋꤛꤢꤩ꤭ꤖꤢꤨ ꤒꤢ꤬ꤟꤢꤩ꤬ ꤊꤢꤦꤚꤟꤢꤩꤥ꤬ꤕꤜꤢꤪꤥ꤬ꤡꤢꤦ꤭ ꤋꤛꤢꤩ꤭ꤜꤢꤨ꤭ꤟꤢꤩꤙꤤ ꤚꤤ ꤢ꤬ꤔꤢ꤬ ꤂꤀꤀꤀ ꤢ꤬ꤋꤢꤧ꤭ꤔꤛꤣ꤬ ꤢꤧ꤬ꤞꤤ꤭ ꤥ꤬ꤊꤢꤨꤥ꤬ꤊꤛꤢ ꤒꤟꤢ꤭ꤏꤢꤦ꤬ꤋꤛꤢꤩ꤭ꤜꤢꤨ꤭ ꤙꤤ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤘꤤ꤭ꤗꤟꤢꤪꤏꤥ꤬ꤠꤟꤤ꤭ ꤕꤢ꤬ꤕꤢꤧꤘꤢꤪ꤭ꤊꤢꤨ꤭ ꤔꤛꤣ꤬꤯

ꤜꤟꤛꤢ꤭ꤋꤛꤢꤩ꤭ꤋꤢꤨ꤬ꤔꤟꤢꤩꤘꤣ ꤢ꤬ꤡꤛꤣꤓꤛꤢ꤬ ꤥ꤬꤬ꤊꤢꤨꤥ꤬ꤊꤛꤢ ꤊꤟꤌꤣ꤭ꤔꤛꤣ꤬ꤒꤢ꤬ꤊꤜꤢꤪꤗꤢ꤬ ꤢ꤬ꤗꤟꤢ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤗꤟꤢꤩ꤬ꤓꤛꤢꤩ꤭ꤊꤟꤢꤩꤚꤢꤩ꤬ ꤢ꤬ꤥ꤬ꤘꤣ ꤊꤟꤢꤩꤊꤜꤢꤪ꤭ ꤔꤢ ꤊꤟꤢꤩꤊꤢꤨ꤭ ꤒꤢ꤬ꤟꤢꤩ꤬, ꤒꤟꤢꤧ꤬ꤡꤢꤪꤙꤢꤧ꤭ ꤋꤢꤨ꤬ꤔꤟꤢꤩ ꤒꤢ꤬ꤟꤢꤩ꤬, ꤔꤢ ꤜꤟꤛꤢ꤭ꤋꤛꤢꤩ꤭ ꤜ꤉ꤟꤤ꤭ꤡꤣ꤬ ꤋꤢꤨ꤬ꤔꤟꤢꤩ ꤒꤢ꤬ꤟꤢꤩ꤬ ꤔꤢ ꤊꤜꤜꤢ ꤔꤢ ꤊꤢ꤬ꤛꤢ꤭ ꤕꤛꤢꤩ꤬ꤒꤤ ꤋꤢꤨ꤬ꤔꤟꤢꤩ ꤒꤢ꤬ꤟꤢꤩ꤬ꤔꤛꤣ꤬꤯

ꤜꤟꤛꤢ꤭ꤋꤛꤢꤩ꤭ ꤗꤛꤢꤩ꤭ꤡꤣ꤬ꤖꤢꤨ ꤒꤢ꤬ꤟꤢꤩ꤬ ꤢ꤬ꤗꤟꤢꤩ꤬ ꤗꤟꤌꤣꤚꤥ꤬ꤖꤢꤧ꤭ꤚꤛꤢ꤭ ꤕ꤉ꤢꤧ꤬

ꤋꤥ꤭ꤗꤢ꤭ꤚꤊꤥ꤬ꤙꤢ꤭ ꤟꤢꤩꤕꤜꤢꤩ꤬ꤟꤛꤢ꤭ꤕꤟꤥ ꤔꤢ “ꤜꤟꤛꤢ꤭ꤋꤛꤢꤩ꤭ ꤛꤢꤩ꤭ꤜ꤉ꤟꤤ꤭ꤡꤣ꤬ ꤥ꤬ ꤋꤢ꤭ꤜꤟꤢꤩ ꤒꤢ꤬ꤕꤚꤟꤢꤧ꤬ꤒꤢ꤬ꤖꤥ꤬ ꤚꤢꤪ ꤊꤢꤦꤚꤟꤢꤩ ꤕꤜꤢꤪꤡꤢꤦ꤭ꤜꤢꤨ꤭ ꤔꤢ ꤗꤟꤢꤩ꤬ꤓꤛꤢ꤬ ꤜꤟꤛꤢ꤭ꤋꤛꤢꤩ꤭ ꤜꤤ꤬ꤜꤟꤢꤧ꤬ ꤔꤛꤣ꤬ꤗꤢ꤬ ꤢ꤬ꤐꤟꤢꤨ꤭ꤔꤢꤒꤥ꤬꤯ ꤗꤢ꤬ꤔꤢꤚꤢꤪ ꤛꤢꤩ꤭ꤋꤥ꤭ꤑꤟꤢ ꤗꤢ꤬ ꤢ꤬ꤥ꤬ꤕꤜꤢꤪꤡꤢꤦ꤭ꤙꤢꤧꤜꤢꤨ꤭ ꤓꤛꤣ꤭ ꤢ꤬ꤗꤟꤢꤩ꤬ꤓꤛꤢ꤬ꤙꤢꤧꤊꤛꤢ꤭ꤟꤢꤪ ꤜꤤ꤬ꤜꤟꤢꤧ꤬ꤟꤢꤪ꤯ ꤖꤢꤨꤔꤛꤣ꤬ꤚꤢꤪ ꤡꤢꤙꤤꤔꤛꤣ꤬ ꤒꤢ꤬ꤑꤢꤩ꤭ ꤔꤛꤣ꤬ꤓꤛꤣ꤭ ꤢꤩ꤬ꤊꤜꤟꤢꤪ꤬ꤢꤩ꤬ꤗꤢ꤬ꤊꤛꤢ꤭ꤔꤢ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ꤗꤟꤢꤪꤑꤢꤩ꤭ꤔꤛꤣ꤬꤯ ꤛꤢꤩ꤭ꤗꤢ꤬ ꤒꤟꤢꤧ꤬ꤘꤣ ꤢ꤬ꤕꤟꤢꤩꤙꤢꤧꤓꤛꤢ꤬ ꤗꤟꤢꤜꤢ꤬ꤊꤥ꤭ꤔꤟꤤ꤯ ꤖꤢꤨꤔꤛꤣ꤬ꤚꤢꤪ ꤢ꤬ꤊꤢꤦꤏꤤ꤭ꤗꤟꤢꤩꤊꤛꤢ꤭ꤒꤥ꤬ ꤢ꤬ꤑꤢꤩ꤭ ꤗꤟꤢꤩ꤬ꤟꤛꤢ꤭ꤒꤢ꤬ꤗꤥ꤭ꤘꤛꤢꤩꤟꤢꤪ꤯"

ꤙꤤ ꤒꤟꤢꤧ꤬ꤥ꤬ꤊꤢꤨ ꤢ꤬ꤓꤛꤣ꤭ꤔꤛꤣ꤬ꤚꤢꤪ ꤢꤩ꤬ꤊꤜꤟꤢꤪ꤬ꤢꤩ꤬ꤗꤢ꤬ ꤚꤟꤥꤊꤛꤢ꤭ꤜꤢꤨ꤭ ꤔꤢ ꤢꤩ꤬ꤕꤚꤤ꤬ꤜꤢꤧ꤭ (꤁꤀) ꤞꤢꤧ꤭ ꤔꤛꤣ꤬ꤗꤢ꤬ ꤢ꤬ꤗꤟꤢ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ ꤓꤛꤣ꤭ ꤕꤚꤟꤢꤧ꤬ꤥ꤬ꤘꤣ ꤊꤟꤢꤩꤊꤢꤨ꤭ꤊꤟꤢꤩꤊꤜꤢꤪ꤭ ꤜꤟꤛꤢ꤭ꤋꤛꤢꤩ꤭ ꤖꤢꤨ ꤒꤢ꤬ꤊꤜꤢꤪ ꤗꤢ꤬ ꤢ꤬ꤗꤟꤢꤩ꤬ꤘꤛꤢꤩ ꤒꤢ꤬ꤗꤥ꤭ꤜꤢ꤬ꤟꤛꤢ꤭ꤟꤢꤪ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ꤔꤛꤣ꤬꤯

ꤡꤢꤟꤢꤪꤙꤤ ꤗꤟꤢꤩ꤬ꤘꤛꤢꤩ ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ ꤢ꤬ꤓꤛꤣ꤭ꤔꤛꤣ꤬ꤚꤢꤪ ꤜꤟꤛꤢ꤭ꤋꤛꤢꤩ꤭ꤖꤢꤨ ꤒꤢ꤬ꤟꤢꤩ꤬ ꤞꤢꤧꤑꤢꤩ꤭ ꤟꤛꤢ꤭ꤚꤟꤥꤘꤛꤢꤩ ꤑꤢ꤬ꤡꤢꤪꤜꤢꤨ꤭ ꤔꤛꤣ꤬ꤗꤢ꤬ ꤜꤟꤛꤢ꤭ꤋꤛꤢꤩ꤭ ꤖꤢꤨ ꤒꤢ꤬ꤕꤚꤟꤢꤧ꤬ ꤘꤛꤢꤏꤥ꤬ꤕꤟꤢꤩꤋꤛꤢꤩ꤭ꤖꤢꤨꤛꤢꤩ꤭꤯

ꤜꤟꤛꤢ꤭ꤋꤛꤢꤩ꤭ꤖꤢꤨ ꤔꤛꤣ꤬ꤒꤢ꤬ꤕꤚꤟꤢꤧ꤬ ꤟꤢꤩꤔꤢ “ꤊꤢ꤬ꤛꤢ꤭ ꤊꤢ꤬ꤍꤢ꤬ ꤔꤢ ꤜꤟꤛꤢ꤭ꤋꤛꤢꤩ꤭ꤘꤣ ꤢ꤬ꤚꤟꤛꤣ꤬ꤔꤛꤣ꤬ ꤢ꤬ꤥ꤬ ꤔꤛꤣ꤬ꤗꤢ꤬ ꤘꤣ ꤢ꤬ꤚꤟꤢꤩꤋꤢꤧ꤭ ꤠꤢ꤭ ꤞꤢꤧꤑꤢꤩ꤭ꤒꤥ꤬꤯ ꤗꤟꤢꤩ꤬ꤟꤢꤪ ꤜꤟꤛꤢ꤭ꤋꤛꤢꤩ꤭ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤗꤟꤢꤪꤑꤢꤩ꤭ ꤔꤛꤣ꤬ ꤒꤢꤦꤚꤢꤪ ꤞꤢꤧꤑꤢꤩ꤭ꤓꤛꤢ꤬ꤔꤥ꤬ꤠꤟꤢꤧ" ꤟꤢꤩꤖꤢꤨꤛꤢꤩ꤭꤯

ꤜꤟꤛꤢ꤭ꤋꤛꤢꤩ꤭ ꤊꤢꤩ꤬ꤋꤥ꤬ꤊꤢꤩ꤬ꤙꤢ꤭ ꤒꤢ꤬ꤊꤜꤢꤪ ꤗꤢ꤬ ꤢ꤬ꤥ꤬ꤊꤢ꤬ꤓꤛꤢ꤬ꤙꤤ ꤗꤢ꤭ꤘꤢ꤬ꤜꤢꤩ꤭ ꤕꤛꤢꤩ꤭ꤗꤢ꤬ꤔꤢ꤭ ꤔꤛꤣ꤬ꤒꤢ꤬ꤊꤛꤢꤩ꤭ ꤓꤛꤣ꤭ ꤥ꤬ꤕꤟꤥꤘꤣ ꤕꤣꤊꤢꤦ꤭ꤊꤟꤢꤩ ꤒꤢꤪ꤬ꤍꤢꤨ꤬ꤠꤟꤤ꤭ ꤜꤢꤩꤒꤥ꤬, ꤛꤢ꤬ꤘꤢꤨ꤬ ꤔꤛꤣ꤬ꤒꤢ꤬ꤊꤛꤢꤩ꤭꤯ ꤓꤛꤣ꤭ ꤊꤢ꤬ꤛꤢ꤭ꤊꤢ꤬ꤍꤢ꤬ ꤢ꤬ꤊꤢꤨ꤭ ꤛꤢꤩ꤭ꤙꤢꤪ꤬ ꤔꤛꤣ꤬ꤒꤢ꤬ꤊꤜꤢꤪ ꤗꤢ꤬ ꤢ꤬ꤥ꤬ꤙꤤ ꤊꤢ꤬ꤛꤢ꤭ꤜꤟꤤ꤬ꤊꤟꤢꤩ ꤘꤤ꤭ꤗꤟꤢꤪꤏꤥ꤬ ꤙꤢꤧꤔꤟꤌꤣ꤭ ꤘꤢꤪ꤭ꤚꤢꤪꤋꤢꤨ꤬, ꤉ꤥ꤬ꤙꤢ꤭ꤙꤢꤘꤢꤪ꤭ ꤔꤛꤣ꤬ꤒꤢ꤬ꤖꤥ꤬꤯

ꤊꤢ꤬ꤛꤢꤜꤢ꤬ꤟ꤉ꤤ꤬ ꤔꤛꤣ꤬ꤒꤢ꤬ꤊꤜꤢꤪꤊꤢꤩ꤬ ꤗꤢ꤬ ꤢ꤬ꤥ꤬ꤘꤣ ꤕꤚꤟꤢꤩꤔꤥꤊꤟꤢꤩ ꤡꤤꤓꤥ꤭ ꤔꤛꤣ꤬ꤓꤛꤣ꤭ ꤕꤚꤟꤢꤧ꤬ꤔꤟꤢꤩꤥ꤬ ꤢ꤬ꤥ꤬ꤚꤟꤥꤜꤣꤊꤜꤢꤪ꤭ꤢꤨ꤭꤯ ꤊꤢ꤬ꤛꤢꤜꤢ꤬ꤓꤢ꤬ ꤢ꤬ꤊꤢꤨ꤭ ꤐꤢ꤬ꤛꤢꤩ꤭ ꤔꤛꤣ꤬ꤒꤢ꤬ꤊꤜꤢꤪ ꤊꤢꤩ꤬ꤗꤢ꤬ ꤢ꤬ꤥ꤬ꤙꤤ ꤕꤚꤟꤢꤩꤔꤥꤊꤟꤢꤩ ꤡꤤꤓꤥ꤭ ꤕꤢꤪ꤭ꤜꤢꤪ꤭, ꤕꤢꤩ꤬ꤜꤢꤪ꤭ ꤔꤢ ꤖꤢꤧ꤬ꤋꤥ꤬ ꤔꤛꤣ꤬꤯ ꤚꤢꤪ ꤖꤢꤨ ꤋꤢ꤭ꤜꤟꤢꤩꤢ꤬ꤥ꤬ꤋꤥ ꤋꤛꤢꤩ꤭ꤜꤢꤨ꤭ ꤔꤛꤣ꤬ꤢ꤬ꤋꤢꤨ꤬ꤚꤢꤪ ꤢ꤬ꤟꤢꤩꤙꤢꤧ꤬ ꤡ꤉ꤤ꤬ꤍꤟꤥ ꤔꤛꤣ꤬ꤗꤢ꤬ ꤢ꤬ꤕꤚꤟꤢ꤬ꤋꤥ ꤋꤛꤢꤩ꤭ꤜꤢꤨ꤭ꤒꤢ꤬ꤊꤤ꤬꤯

ꤜꤟꤛꤢ꤭ꤋꤛꤢꤩ꤭ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤜꤤ꤬ꤜꤟꤢꤧ꤬ ꤔꤛꤣ꤬ꤗꤢ꤬ ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤒꤢ꤬ꤊꤜꤢꤪ ꤊꤢꤦꤚꤟꤢꤩ ꤕꤟꤢꤦꤊꤜꤟꤢꤪ꤬ꤗꤢ꤬ ꤕꤜꤢꤩ꤬ꤟꤛꤢ꤭ꤙꤢꤧ ꤢ꤬ꤑꤢꤩ꤭ꤔꤛꤣ꤬ꤚꤢꤪ ꤗꤟꤢꤩ꤬ꤒꤟꤛꤣꤊꤟꤌꤣ꤭ ꤒꤟꤢꤧ꤬ꤔꤢ ꤕꤚꤟꤢꤧ꤬ꤗꤟꤢꤩ꤬ꤡ꤉ꤟꤥꤒꤟꤢꤧ꤬ ꤢ꤬ꤗꤟꤢ ꤢꤧ꤬ꤡꤤ꤬ꤥ꤬ ꤒꤢ꤬ꤟꤢꤩ꤬ ꤢ꤬ꤟꤛꤢ꤭ꤙꤢꤪꤗꤥ꤭ꤕꤟꤢꤩꤊꤟꤌꤣ꤭ ꤒꤟꤢꤧ꤬ꤗꤟꤢꤩ꤬ꤞꤛꤥ ꤒꤢ꤬ꤊꤜꤢꤪ ꤕꤢ꤭ ꤔꤛꤣ꤬ꤗꤢ꤬ ꤕꤚꤟꤢꤧ꤬ꤋꤛꤢꤋꤢꤨ꤬ ꤜꤢꤪ꤭ꤚꤢꤩ꤭ ꤟꤢꤩꤖꤢꤨꤛꤢꤩ꤭꤯

ꤕꤚꤟꤢꤧ꤬ꤋꤛꤢꤋꤢꤨ꤬ ꤜꤢꤪ꤭ꤚꤢꤩ꤭ ꤟꤢꤩꤔꤢ “ꤊꤢ꤬ꤛꤢ꤭ꤘꤢꤨ꤬ ꤒꤢ꤬ꤟꤢꤩ꤬ ꤙꤢꤧ꤬ꤟꤢꤩꤢꤧ꤬ꤞꤤ꤭ ꤔꤢ ꤙꤢꤧ꤬ꤤ꤬ꤞꤛꤥꤒꤟꤢ꤭ꤕꤟꤢꤩ ꤢꤧ꤬ꤞꤤ꤭ ꤢ꤬ꤖꤢꤨꤢ꤬ꤜꤟꤛꤢꤩ꤬ꤔꤢ ꤜꤟꤛꤢ꤭ꤋꤛꤢꤩ꤭ꤍꤟꤥ ꤕꤢ꤭꤯ ꤚꤢꤪ ꤛꤢꤩ꤭ꤔꤛꤣ꤬ꤗꤢ꤬ ꤢ꤬ꤗꤟꤢ ꤕꤚꤟꤢꤧ꤬ꤜꤟꤢꤨ꤬ꤗꤛꤢꤩ꤭ ꤢ꤬ꤑꤢꤩ꤭ ꤚꤢꤪ ꤙꤢꤧ꤬ꤗꤟꤢꤩ꤬ꤠꤟꤢꤧ꤯ ꤏꤤꤔꤥ꤬ꤏꤤꤋꤛꤢꤩ꤭ ꤕꤟꤢꤧ꤬ꤖꤢꤨꤕꤟꤢꤧ꤬ꤜꤟꤛꤢꤩ꤬ ꤔꤛꤣ꤬ꤗꤢ꤬ ꤕꤟꤢꤧ꤬ꤘꤛꤢꤩꤙꤢꤧ ꤢꤧ꤬ꤞꤤ꤭ ꤢꤨ꤬ꤡꤢꤧ꤭ ꤔꤛꤣ꤬ꤗꤢ꤬ ꤢ꤬ꤗꤟꤢꤠꤟꤢꤧ ꤛꤢꤩ꤭ꤒꤢ꤬ꤊꤟꤌꤛꤣ꤬" ꤟꤢꤩꤡꤛꤣꤖꤢꤨꤛꤢꤩ꤭ꤔꤛꤣ꤬꤯